Qurban Qurbanov: Zalsburq bizə bu günkü kimi oynamağa imkan verməyəcək

Azərbaycan çempionu "Qarabağ"ın baş məşqçisi Qurban Qurbanov UEFA Çempionlar Liqasının ikinci təsnifat mərhələsi çərçivəsində Malta "Valletta"sına qarşı keçirdikləri cavab oyunundan sonra fikirlərini açıqlayıb. Azerisport.az xəbər verir ki, o, komandasının 4:0 hesablı qələbəsini belə şərh edib:

"Çox çətin oyun oldu. Yaxşı oynadığımızı düşünürəm. Qələbə qazanmaq bizim üçün vacib idi. Amma hələ üzərində işləməli olduğumuz çatışmazlıqlar var. Qələbəyə görə şadıq. Qarşıda bizi "Zalsburq"la oyun gözləyir. Artıq oyunçulara "Valletta" üzərindəki qələbəni unudub, növbəti oyunlara köklənmələrini tapşırmışam.

Reynaldonu niyə əvəzlədim? Onun kiçik zədəsi vardı. Bu üzdən risk etmək istəmədim.

Deməzdim ki, "Zalsburq" arzuolunmaz rəqibdi. Belə fikirlərlə razı deyiləm. Kim düşməliydisə, o da düşdü. Qismət beləymiş.

Qara Qarayevin sağlamlığı ilə bağlı hansısa problem olacağını düşünmürəm. Maksim Medvedev də tezliklə sıraya dönəcək. Rəşad Sadıqova gəlincə, ola bilər ki, "Zalsburq"la ilk oyuna tam hazır olmasın.

"Zalsburq"un baş məşqçisinin oyunumuzu izlədiyini bilirdim. Amma biz onlardan heç nəyi gizləmədik. Başa düşürük ki, avstriyalılar bizə bu gün oynadığımız kimi çıxış etmək şansı yaratmayacaqlar.

Əlbəttə, Avstriya klubu ilə ilk oyunu səfərdə keçirmək daha yaxşı olardı. Amma püşk belə tələb edir. Hazırlaşmaq üçün kifayət qədər vaxtımız var. Bilirəm ki, sürətli futbolçuları var. Bu komanda çox güclüdü və bizə çətin olacaq".