İbrahim Şehiç: Zalsburq ilə oyunlarımız fərqli olacaq

"Qarabağ"ın qapıçısı İbrahim Şehiçin azerisport.az saytına müsahibəsi

- Malta "Valletta"sı ilə cavab oyununu (4:0) necə qiymətləndirərdiz?
- Biz yaxşı oynadıq və nəticədə böyük hesabla qalib gəldik. Özümüzə heç bir problem yaratmadıq. Bu, bizim bu oyun üçün əsas hədəfimiz idi.

- Sizin bu oyunda işiniz demək olar ki, olmadı. Hətta stadiondan gedə, ya da kofe içə bilərdiz...
- (gülür) Hə, rəqib mənim üçün xüsusi çətinlik yaratmadı. Amma bu, dəqiq oynayan və baş məşqçimizin bütün tapşırıqlarını yerinə yetirən komandamızın xidmətinin bəhrəsiydi.

- Belə böyük hesabla qalib gəlmək nə dərəcədə vacib idi?
- Çox vacib idi. İlk növbədə psixoloji baxımdan. Belə nəticəni biz Maltada da qazanmalıydıq. Amma orada rəqib qolkiper möhtəşəm oynamışdı. Burada isə hər şey fərqli oldu.

- Belə oyunla Avstriya "Zalsburq"u ilə görüşlərdə nəyəsə ümid etmək olar?
- Hamıya aydındı ki, "Zalsburq"la oyunlar fərqli olacaq. Bu komanda kifayət qədər ciddi rəqibdi.

- Onların oyunlarına baxmısız?
- Onların ötən mövsüm keçirdiyi oyunların icmallarına baxmışam. Şəxsən bir neçə oyunun özüm izləmişəm. Çox ciddi komandadı.

- "Qarabağ" bu komanda ilə oyunlarda nəyə ümid edə bilər?
- Dünya çempionatından sonra belə fikir formalaşıb ki, istənilən komanda çox şeyə ümid edə bilər. Əminəm ki, növbəti ev oyunumuza daha çox azarkeş gələcək. Onlar bizim 12-ci oyunçumuz olmalıdılar.

- Oyundan sonra klub prezidenti Abdulbari Gözəl sizi təbrik etdi. Adətən belə görüşlərdə futbolçulara mükafat verirlər. Elə bir söhbət olmadı?
- Bəlkə də oldu, amma mən azərbaycanca hələlik, pis başa düşürəm (gülür).

- Belə söhbətləri hamı başa düşür...
- Belə deyim də: bizim əziyyətimizin, qələbələrimizin qarşılığında verilən puldan razıyıq. Biz də bunun qarşılığını meydanda verməyə çalışırıq.