Qarabağ 70 000 000 avroya qarşı
İdman direktoru - Ralf Ranqnik. Beynəlxalq idman direktoru - Jerar Ulye. Büdcə - 70 milyona yaxın. 8 qat Avstriya çempionu. Hədəf - 20 il sonra Çempionlar Liqasının qrup mərhələsinə çıxmaq.
Bütün bunlar "Qarabağ"ın Çempionlar Liqasının üçüncü təsnifat mərhələsindəki rəqibi - Avstriya "Zalsburq"una aiddi. Komandanın baş məşqçisi Adolf Hütterdi. O, bu posta sabiq baş məşqçi Rocer Şmidtin Almaniyanın "Bayer" klubuna gedişindən sonra təyin olunub.
Hütter komandanın son mövsümdəki heyətini yeni futbol ili üçün də qoruyub. Komandanın lideri, qoleadoru vaxtilə "Barselona"nın heyətində oynamış Conatan Sorianodu. O, son mövsümdə 31 qol vurub və Avstriya Bundesliqasının bombardiri olub. Braziliyalı Alan da ondan geri qalan deyil - 26 qol.
"Zalsburq" gənclərdən ibarət komandadı. Hazırda komandanın orta yaş həddi 24-dü. Heyətin 74 faizi legionerlər, 12 faizi isə Avstriya yığmalarına çağırılan futbolçulardan təşkil olunub.
Bu komanda ötən avrokuboklar mövsümündə Avropa Liqasında uğurlu çıxışı ilə yadda qaldı. "Zalsburq" mübarizəyə Çempionlar Liqasından başlasa da, Türkiyənin "Fənərbağça" klubu ilə görüşlər uğursuz oldu (1:1, 1:3). Nəticədə bu komanda Avroliqada Litva "Jalgiris"i ilə mübarizə apardı və qalib gəldi - 5:0, 2:0. Hazırda Bakı "İnter"inin rəqibi olan İsveç "Elfsborq"u da bu komandanın qurbanları arasında olmuşdu - 4:0, 1:0. Eyni aqibəti Danimarka "Esbyerq"i (3:0, 2:1) və Belçika "Standard"ı da (2:1, 3:1) yaşamışdı. 1/16 finalda rəqib Hollandiya "Ayaks"ı olmuşdu - 3:1, 3:0. Avstriyalıların 10 oyunluq qələbə seriyasına yalnız İsveç "Bazel"i son qoya bilmişdi (2:1, 0:0).
