Bədavi Hüseynov: Anjiyə qayıtmaq istərəm
Futbol üzrə Azərbaycan yığmasının və "Qarabağ"ın müdafiəçisi Bədavi Hüseynov Rusiya mətbuatına müsahibə verib. Azerisport.az sizi həmin müsahibə ilə tanış edir.
- "Qarabağ"a Çempionlar Liqasının növbəti mərhələsində Avstriya "Zalsburq"u rəqib ola bilər...
- Əlbəttə, çox ciddi rəqibdi. Amma hələ onlar haqda danışa bilmərik. Bizi Malta "Valletta"sı ilə cavab oyunu gözləyir.
- Zədəli Rəşad Sadıqovu əvəzləyirsiz. Onun sıraya dönməsi sizin əsas heyətə düşmək yolunda işinizi çətinləşdirəcək?
- Ötən mövsüm Rəşad Sadıqovla birgə demək olar ki, 32 oyunda meydanda olmuşdum. İndi də hiss edirəm ki, mənə güvəniləcək.
- İki il öncə "Anji"də çox forma şansı qazanmayan Bədavi Hüseynovla indiki arasında nə kimi fərqlərv var?
- Fikrimcə, mən sadəcə, bir qədər təcrübəli olmuşam. Güclü komandalara qarşı oynamaq şansı qazanmışam. Belə rəqiblərlə oyunlarda artırmamaq mümkün deyil. Mənə şans verdilər və bu şansı dəyərləndirməyə çalışdım.
- "Anji"dən incik ayrıldınız?
- Əlbəttə, üzücü idi. Amma mən indi heç nəyə görə təəssüflənmirəm. Azərbaycanda mənə verilən şansa görə təşəkkürümü bildirirəm.
- Evdə nə vaxt olmusan? Dağıstana gələ bilirsən?
- Ev üçün təbii ki, çox darıxıram. Sonuncu dəfə iyunun əvvəlində orada olmuşdum. İki həftəlik gəldim. Təqvim elədi ki, bu, tez-tez mümkün olmur.
- Azərbaycandakı həyatına tam alışmısan?
- Bəli, tam alışmışam. Burada hər şey ürəyimcədi, xoşuma gəlir, ölkə inkişafdadı, özü də böyük templə. Bu, xüsusilə Bakıya aiddi.
- Son iki ildə ölkə çempionu olmusan, yığmaya dəvət olunmusan. Sənə çox güvənirlər?
- Bütün bu uğurlarımda məşqçilərimin rolu böyükdü. Hiss edirəm ki, mənə güvənirlər, Mən də onların bu etimadını doğrultmağa çalışıram.
- Berti Foqtsla çalışmaq necədi?
- Əlbəttə, o, böyük hərflərlə əsl peşəkardı. Belə mütəxəssislə çalışmaq böyük xoşbəxtlikdi. Azərbaycan yığması son illərdə çox artırıb və bunda Foqtsun xidməti böyüldü.
- Millidə neçə oyun keçirmisən, hansı oyun daha çox yadında qalıb?
- Bildiyim qədərilə 13-14 oyunda meydanda olmuşam. ABŞ ilə son oyun yaddaqalan oldu. 0:2 hesabıyla uduzsaq da, yaxşı təsir bağışladıq. Amma daha çox yaddaqalan oyun təbii ki, Rusiyaya qarşı Bakıda keçirdiyimiz matç idi - 1:1.
- Klubun "Qarabağ"dan danış...
- Böyük tarixə malik klubdu. Qarşısına hər turnirdə yüksək hədəflər qoyulur. Komandada çoxlu legionerlər var - braziliyalılar, albanlar, hollandlar, makedoniyalılar. Komandanı vaxtilə Rusiyada oynamış Qurban Qurbanov çalışdırır. Onun rəhbərliyi altında kombinasiyalı və hücum futbolu sərgiləməyə çalışırıq.
- Komandanın bazası Ağdamdadı?
- Yox, Bakıda hazırlaşırıq. Burada bazamız var, üç məşq meydançamız var, şərait əladı. Oyunlarımızı da Bakıda keçiririk.
- Komandanı kim maliyyələşdirir?
- "Azərsun Holdinq" şirkəti.
- Azərbaycan çempionu olmaq nə dərəcədə vacib uğurdu?
- 20 il idi buna nail ola bilmirdik. Ona görə də son çempionluğumuz bizim üçün çox yaddaqalan oldu.
- Sən "Qarabağ"a "Sumqayıt"dan keçmisən. Bu klublar arasında səviyyə fərqi çox yüksəkdi?
- "Sumqayıt"a oyun təcrübəsi qazanmaq üçün keçmişdim. Mən elə orada olarkən "Qarabağ"a necə hörmət olduğunu görürdüm. Səviyyə fərqi də yüksəkdi.
- Azərbaycan klublarındakı maaşla Rusiya klublarındakı arasında müqayisə aparmaq olar?
- Azərbaycanda da futbolçulara yaxşı maaş verilir. Futbola böyük investisiya yatırılır. Rusiya Premyer Liqasının alt sıralarında qərarlaşan klublardakı maaşlarla müqayisə etmək olar.
- Dağıstandan Azərbaycana gedən başqa futbolçular da var. Onlarla əlaqən var, işləri necə gedir?
- Bəli, burada 10 dağıstanlı futbolçu var. Onlardan biri - Məhəmməd Mirzəbəyov mənimlə "Anji"nin gənclərdən ibarət komandasında çıxış edib. O da "Sumqayıt"a gəlmişdi. Sonradan "İnter"ə transfer olundu.
- Azərbaycanda nə qədər oynamağı düşünürsən? "Anji"yə qayıtmaq fikrin var?
- Hələlik klubumla müqaviləm var. Məni burada hər şey qane edir. Amma gələcəkdə hər şey ola bilər. Ola bilər ki, gələcəkdə mənə doğma olan klubda çıxış etmək şansı qazanım.
