Qurbanov: Arxayınlaşmaq olmaz
Ölkəmizi UEFA Çempionlar Liqasında təmsil edən "Qarabağ" ikinci təsnifat mərhələsi çərçivəsinin cavab qarşılaşmasında sabah Malta "Valletta"sını qəbul edəcək. Azerisport.az xəbər verir ki, "Qarabağ"ın baş məşqçisi Qurban Qurbanov bu gün təşkil olunmuş mətbuat konfransında öncə bunları deyib:
"Rəqib bizim üçün artıq tanış komandadı. Maltada hansı çatışmazlıqlarımızın olduğunu gördük. Oyunumuzda bəzi problemlər var idi. Amma bu, gözlənilən idi".
Qurbanov cavab oyununda da diqqətli olmağın vacibliyini vurğulayıb: "Yaxşı nəticə qazansaq da, arxayınlaşmaq olmaz. Çalışmalıyıq ki, ev oyununda səhvsiz oynayaq".
Qurbanov ÇL-in üçüncü təsnifat mərhələsində onları gözləyən Avstriya "Zalsburq"undan danışmaq istəməyib: "İndi "Zalsburq" mənə maraqlı deyil. Ən kiçik səhv bizə baha başa gələ bilər. Ona görə də avstriyalılardan nəsə gizləməyə çalışmayacağıq. Bizim belə lüksümüz yoxdu".
Qurbanov qarşılaşmanın ənənəvi olaraq 21:00-da yox, yarım saat gec başlamasının da səbəbini açıqlayıb: "Bu, orucluğa görədi. Qoy azarkeşlərimiz oyuna qədər iftarlarını da aça bilsinlər".
