Acius: Qarabağa qarşı elə oynamalıyıq ki, qapıçımızın işi az olsun
Ölkəmizi UEFA Çempionlar Liqasında təmsil edən "Qarabağ" ikinci təsnifat mərhələsi çərçivəsinin cavab qarşılaşmasında sabah Malta "Valletta"sını qəbul edəcək. Azerisport.az xəbər verir ki, oyundan bir gün əvvəl rəqib komandanın baş məşqçisi Gilbert Aciusun matçla bağlı mətbuat konfransı təşkil olunub.
O, oyunla bağlı bunları deyib:
"Qarabağ" yaxşı komandadı. Ötən illərdə göstərdiyi nəticələr də "Qarabağ"ın yaxşı komanda olduğunu göstərir. Rəqibə hörmətlə yanaşsaq da, qürurumuz üçün oynayacağıq. Maraqlı oyun olacaq.
- Komandaya əsas tapşırınız nə olacaq?
- Mən məşqçiliyə təzə başlamışam. Mənim üçün yaxşı performans göstərmək daha vacibdi. Mənim üçün nəticədən daha çox sərgilədiyimiz oyun vacibdi. Yaxşı oyun nümayiş etdirsək, nəticə də gələcək.
- Komandalar adətən oyundan əvvəl matçın keçiriləcəyi vaxtda məşq edir. Sizin bir gün əvvəl məşqi tez keçirməyinizin səbəbi nədi?
- Bunun iki səbəbi var. Birincisi, məşqlə oyun arasında xeyli vaxt yaranacaq. İkincisi isə vaxtında qidalanmaq və rahat yatmaqla bağlıdı.
- "Zalsburq" haqda düşünmüsüz?
- Bizim üçün önəmli olan "Qarabağ"la oyundu. Əlbəttə, "Zalsburq" barədə məlumatım var. Ancaq indidən bu haqda düşünmək sadəcə, boş yerə enerji sərfiyyatıdı.
- "Valletta"nın futbolçuları iddialı danışsa da, siz bir az təslim olmuş kimi danışırsız. Bunun səbəbi nədi?
- Bu, düzgün deyiı. Mən pessimist olduğumu düşünmürəm. Sabah komandamız yaxşı oynamalıdı. Qapıçımız ilk oyundakı kimi matçın qəhrəmanı olmayacaq. Elə oynamalıyıq ki, onun işi az olsun.
- Dolu tribunalar qarşısında oynamağa hazırsız?
- Heyətimizdə təcrübəli futbolçular çoxdu. Amma doğma meydan amili "Qarabağ" üçün üstünlükdü. Onları çoxlu azarkeş dəstəkləyəcək.
- Siz yığmada oynayarkən Malta Azərbaycan millisinə böyük hesabla qalib gəlib. Yadınızdadı?
- Hə, biz həmin oyunda 3:0 hesabıyla qalib gəldik, mən isə iki qol vurdum. Yaxşı xatırlayıram.
