XL yeni transferləri ilə güldü

Xəbər verdiyimiz kimi, Sloveniya toplanışı çərçivəsində ikinci yoxlama oyununa çıxan “Xəzər Lənkəran” meydandan qələbə ilə ayrılıb. Azerisport.az xəbər verir ki, "ağ-yaşıllar" Latviya təmsilçisi “Yurmala” ilə oyuna aşağıdakı start heyəti ilə çıxıb:

Tərlan Qasimzadə, Tural Cəlilov, Rasim Ramaldanov, Adrian Skarlatake, Aleksandr Şemonayev, Rahid Əmirquliyev (k), Uğur Pamuk, Fernando Qabriel, Ağabala Ramazanov, Junior Nildo, Dejan Blajevski.

Start fiti səsləndikdən az sonra “Xəzər Lənkəran” erkən qola imza atdı. Fernando Qabriel cərimə zərbəsindən birbaşa zərbə ilə uzaq küncü dəqiq nişan aldı. Qoldan sonra ilk hissənin 30 dəqiqəsi nəzərə alınmaqla ərazi üstünlüyü cənubluların tərəfində olsa da, hesab dəyişmədi. İlk hissənin sonuna doğru rəqib komandanın fəallaşdığı və nisbətən daha kəsərli hücumlara qurmağa meyillənməsini də vurğulayaq. İkinci hissə də baş məşqçimiz Oğuz Çətin Ramaldanov - Tieqo, Saşa - Vanderson, Uğur - İvanov, Fernando - Sadiqov, Ramazanov - Elnur Abdullayev əvəzetmələrini həyata keçirdi ki, sona 25 dəqiqə qalmış “Xəzər Lənkəran”ın yeni transferi Rauf Əliyev də Nildonu dəyişməklə debüt etdi. İlk hissənin sonundakı fəallığını ikinci yarıda da davam etdirən rəqib 57-ci dəqiqədə hesabı bərabərləşdirdi. Georgi Diaşvili meydandakı fəallığını qolla tamamlamağı bacardı. Lakin qoldan sonra soyuqqanlı görünən “Xəzər Lənkəran” daha inamlı və topa hakim olmaqla rəqibi tamamən qapısına doğru sıxışdırmağa başladı. Nəticədə 75-ci dəqiqədə Rauf Əliyev və iki dəqiqə sonra Rəşad Sadiqov fərqlənməklə yekun nəticəni müəyyənləşdirdilər - 3:1. (klub saytı)