Slavço Georgiyevski: Cavab görüşündə çoxlu azarkeş görmək istəyirəm

Bakı "İnter"inin yarımmüdafiəçisi Slavço Georgiyevski Avropa Liqasının ikinci təsnifat mərhələsi çərçivəsində İsveç "Elfsborq"una qarşı keçirdikləri ilk oyundan sonra fikirlərini açıqlayıb. Azerisport.az saytına açıqlamasında o, komandasının 1:0 hesablı qələbəsini belə şərh edib:

"Biz bütün Azərbaycan xalqını sevindirmək istəyirdik. Bu qələbə azarkeşlərimizə çox lazım idi. Çünki hər bir qələbə ölkənin reytinqinə də müsbət təsir göstərir. Cavab oyununda da qalib gəlmək lazımdı".

Oyundakı yeganə qolun müəllifi olan makedoniyalı futbolçu daha çox şanslarının olduğunu da gizlətməyib: "Çox təəssüf ki, ələ düşən fürsətlərin yalnız birindən yararlana bildik. Elə təkcə mənim daha bir qol vurmaq şansım oldu, amma alınmadı.

Qol vurduğum ana gəlincə, mən sadəcə, dəqiq və güclü zərbə vurmağa çalışdım. Şadam ki, alındı. Cavab görüşündə mümkün qədər çox azarkeş görmək istəyirəm. O zaman biz meydanda 11 yox, 25 nəfərlə mübarizə aparmış olacağıq".

Bu komandalar arasındakı cavab oyunu iyulun 24-də Bakıda keçiriləcək.