Almeyda: Valletta səddini keçək, sonra Zalsburqdan danışarıq
"Qarabağ"ın yarımmüdafiəçisi Riçard Almeydanın azerisport.az saytına müsahibəsi
- Malta "Valletta"sı ilə ilk oyunla bağlı təəssüratlarınız necədi?
- "Valletta" yaxşı rəqibdi Çətin oyun oldu, amma şadam ki, qalib gəldik.
- Vura bilmədiyiniz penalti ilə bağlı nə deyə bilərsiz?
- Mən həmişə elə vururam. Amma bu dəfə alınmadı. Əsas odu ki, qələbə qazandıq. Bakıda da qalib gəlməyimiz lazımdı. Bunun böyük və ya minimal hesabla olması önəmli deyil.
- "Zalsburq"la düşməyinizi necə qarşıladınız?
- Biz hələ "Valletta" səddini keçək, sonra növbəti mərhələ barədə danışarıq.
- Cavab oyununda komandadan nə gözləyək?
- Evdə də qələbə qazanmaq istəyirik. Səfərdəki 1 qol ümumi uğur üçün yetərli olmaya bilər. Ümidvaram ki, cavab matçına çoxlu azarkeş gələcək.
- Danilo Diasın gəlişindən sonra komandada braziliyalıların sayı 4-ə yüksəldi. Bu, nədənsə xəbər verir?
- Fikrimcə, biz indi daha keyfiyyətli oyun sərgiləyirik. Bizim yeni mövsüm üçün həm ölkə daxilində, həm də beynəlxalq arenada iddiamız böyükdü. Çempionluq titulumuzu qorumaq və ölkə kubokunu qazanmaq istəyirik. Dias da "Qarabağ"ı gücləndirib. Biz daha yaxşı oynayacağıq.
