Saşa Stamenkoviç: Koper indiki halda bizdən daha güclüdü
"Neftçi"nin qapıçısı Saşa Stamenkoviç Avropa Liqasının ikinci təsnifat mərhələsi çərçivəsində Sloveniya "Koper"inə qarşı keçirdikləri ilk oyundan sonra azerisport.az saytının suallarını cavablandırıb:
- Oyun barədə nə deyə bilərsiz?
- Uğur bizim tərəfimizdə deyildi. Çoxlu qol epizodlarımız oldu. Sadəcə, onların qapıçısı uğurlu oyun keçirdi.
- Amma eyni sözləri sizin haqqınızda demək olmaz...
- İlk qol zamanı top öz oyunçumuza toxunaraq qapıya daxil oldu.
- İkinci qol isə sizin uğursuz çıxışınız nəticəsində gerçəkləşdi...
- Hə, rəqib futbolçu topa məndən daha erkən çatdı. Belə hücumlar "Koper"in ən güclü tərəfidi.
- "Koper" "Neftçi"dən güclüdü?
- İlk hissədə onlar göstərdilər ki, hazırkı məqamda bizdən daha yaxşıdılar.
- Bu nəticədən sonra "Neftçi" ötən il olduğu kimi, avrokuboklardakı mövsümü elə ilk cəhdindəcə başa vurmağa çox yaxındı...
- Hələ hər şey itirilməyib. İki il öncə biz Kipr APOEL-i ilə evdə 1:1 oynadığımız halda, səfərdə onlara qalib gəlib, mərhələ adladıq. Bunu hamı yaxşı xatırlayır. Bu dəfə də dönüş edə bilərik.
- Deməli, ümidinizi itirmirsiz?
- Biz onları keçəcəyimizə əminik. Əgər onlar bizi Bakıda məğlub etdilərsə, biz niyə onlara səfərdə qalib gəlməyək?
- Vitse-prezidenti Tahir Süleymanov deyib ki, bu mərhələni keçə bilməsək, heç kimin "Neftçi"də qalmağa haqqı yoxdu...
- O, oyundan sonra bizə də eyni sözləri dedi. Amma bu sözlər emosiyadan irəli gələrək söylənilib. Tahir Süleymanov bizim klubda önəmli fiqurlardandı. O, ötən illər ərzindəki fəaliyyəti ilə bunu sübut edib.
