Böyükağa Hacıyev: Koperi keçsək də, istefa verərəm

"Neftçi"nin baş məşqçisi Böyükağa Hacıyev Avropa Liqasının ikinci təsnifat mərhələsi çərçivəsində Sloveniya "Koper"inə qarşı keçirdikləri ilk oyundan sonra fikirlərini açıqlayıb. Azerisport.az xəbər verir ki, o, komandasının 1:2 hesablı məğlubiyyətini belə şərh edib

"Buraxılan iki qol bizim üçün gözlənilməz oldu. Heç bir məşqçi qapıçısının, futbolçularının belə səhvlər buraxmasını istəməz. Amma futbolda belə də olur. İkinci hissədə biz rəqibi təzyiq altında saxlasaq da, heç nə alınmadı. Qol vəziyyətlərimiz oldu. Rəqib öz qapısına çox qapanmışdı. Onlar öz adi futbollarını oynadılar. Cavab oyununda onlara sürpriz hazırlamağa çalışacağıq.

Ruslan Qurbanovun qol vurduğu epizodda heç nə yox idi. Təkrarara baxmaq lazımdı. 1:2 başqadı, 2:2 başqa. Qol hesaba alınmalı idi.

İstefa çağırışları? Bu şüarların kimə ünvanlandığını bilmədim. Komandanın baş məşqçisi mənəm və məsuliyyəti öz üzərimə götürməyə hazıram. Azarkeşlər hər zaman yeni nəsə görmək istəyirlər. Yəqin ki, əcnəbi məşqçi gətirilməsini gözləyirlər.

Oyundan sonra niyə ehtiyat oyunçular skamyasında oturmuşdum? Bəli, düşünürdüm ki, getmək vaxtı deyi ki? İstefadan qorxmuram. Hətta mərhələni keçsəm belə, gedə bilərəm.

Hər bir evdə, ailədə narazılıq ola bilər. "Neftçi"də də problemlər var. Bu, xalqın komandasıdı. Görünür, mənim xidmətlərim heç nəyə yaramayıb.

"Neftçi"nin göstərdiyi oyun gözünüzün önündədi. Mən həmişə hücum futboluna üstünlük vermişəm. Bundan sonra da elə olacaq. Mənim istefamdan daha çox jurnalistlər itirmiş olacaq".