Qəbələ Hollandiyadakı ilk sınağından 4 qolluq qələbə ilə ayrıldı
Hollandiyada yeni mövsümün hazırlıqlarını davam etdirən "Qəbələ" toplanış çərçivəsində ilk oyununu keçirib. Azerisport.az xəbər verir ki, "qırmızı-qaralar" yerli "Arnem"lə qarşılaşıb. Komandamız meydana aşağıdakı heyətlə çıxıb:
Anar Nəzirov, Elnur Allahverdiyev, Rafael Santos, Pavol Farkaş, Ruslan Əmircanov, Adrian Ropotan, Ruslan Abışov, Dodo, Cavid Hüseynov, Elvin Camalov, Andrey Kristya.
Matç başdan sonadək "Qəbələ"nin üstünlüyü şərairtində keçib. İlk hissə ərzində "qırmızı-qaralar" bir neçə əlverişli qol epizodu yaratsa da, fasiləyə kimi hesab açılmayıb.
İkinci hissədə Dorinel Muntyanu meydana Viktor Mendi, Nizami Hacıyev, Pulhak, Ürfan Abbasov, Müşfiq Teymurov, Sadiq Quliyev, Şirməhəmməd Məmmədov, Murad Musayev və Vladimir Levini buraxıb. "Qəbələ" rəqibin müqavimətini 73-cü dəqiqədə qırmağı bacarıb. Nizamı Hacıyev hesabı açıb. 2 dəqiqə sonra Murad Musayev Nizami Hacıyevin künc zərbəsindən ötürdüyü topu başla tora göndərib. 82-ci dəqiqədə hesab arasındakı fərq 3-ə çatıb. Kristya dəqiq zərbə ilə rəqibi mərkəzə dəvət edib. Matçda son nöqtəni də rumıniyalı qoyub. 85-ci dəqiqəyə təsadüf edən qolla Kristya dublunu rəsmiləşdirib.
Beləliklə, "Qəbələ" Hollandiyada keçirdiyi ilk sınaq oyununda böyükhesablı qələbə qazanıb. Komanda növbəti matçını iyulun 20-də Hollandiya təmsilçisi "AZ Alkmaar"a qarşı keçirəcək.
