Erik Ramos: Bakıda qol buraxsaq, səfərdə işimiz çətin olacaq
"Neftçi"nin yarımmüdafiəçisi Erik Ramosun azerisport.az saytına müsahibəsi
- Komandanız Avropa Liqasının ikinci təsnifat mərhələsindəki rəqibiniz Sloveniya "Koper"i ilə oyuna hazırdı?
- Fikrimcə, biz Türkiyə və Avstriyada yaxşı toplanış keçmişik. Yaxşı komandalarla yoxlama oyunlarında qüvvəmizi sınadıq. Bu hazırlıq nəinki "Koper"lə oyun, həm də Avropa Liqasının qrup mərhələsinə vəsiqə qazanmağımız üçün yetərli hesab oluna bilər.
- Rəqib barədə nə deyə bilərsiz?
- "Koper"in oyunlarına baxmışam. Yaxşı komandadı. Sloveniya futbolu hazırda yaxşı səviyyədədi. Ucaboy və fiziki cəhətdən güclü futbolçuları var.
- Bəs "Neftçi" son mövsümlə müqayisədə güclənib?
- Hə, hesab edirəm ki, biz daha güclü olmuşuq. Heyətdəki dəyişiklərə baxmayaraq, indi daha güclüyük. Düzdü, "Koper" də ötən mövsüm uduzduğumuz Albaniya "Skenderbeu"su ilə müqayisədə güclüdü. Belədə, bizi ciddi qarşıdurma gözlədiyini demək olar.
- "Koper" Monteneqro "Çelik"i ilə oyunda 9 cavabsız qol vurmaqla çox güclü olduğunu göstərdi...
- Biz ötən mövsüm albanları keçməyə borclu idik. Amma bəxtimiz gətirmədi. Bu mövsüm elə olmayacaq. "Koper"in 9 qol vurmasına gəlincə, onlar zəif komanda ilə oynayırdılar. Bu qədər qol bizi qorxutmamalıdı. Yəqin ki, siz bizim də "Koper"ə qarşı monteneqrolular kimi oynayacağımızı düşünmürsüz.
- Siz razısız ki, "Koper" indi "Neftçi"dən daha yaxşı formadadı? Ən azından onlar iki rəsmi oyun keçiriblər...
- Ola bilər. Psixoloji planda da yüksəlişdədilər. Amma bu, onların bizimlə oyunlarda favorit olmasına əsas vermir. Yoxlama oyunlarındakı kimi çıxış etsək, uğur bizim tərəfimizdə olacaq.
- İlk oyundan nə gözləyirsiz?
- Ümid edirəm ki, qol buraxmadan qələbə qazanacağıq. Əgər qol buraxsaq, cavab görüşündə işimiz çətin olacaq. Mütləq qol vurmalıyıq. Bir qoldan daha çox vura bilsək, üçüncü təsnifat mərhələsinə vəsiqə qazanmaq şansımız daha da artmış olacaq.
