"Azərbaycanda da İnter adlı klubun olduğunu bilmirdim"

İsveçin "Elfsborq" klubunun yarımmüdafiəçisi Markus Rohden Avropa Liqasının ikinci təsnifat mərhələsində qarşılaşacaqları Bakı "İnter"indən danışıb. Azerisport.az saytına müsahibəsində o, bunları söyləyib:

"İsveçdə hazırda çempionatın davam etməsi bizim üçün üstünlükdü. Təəssüf ki, son turda az qala məğlub olacaqdıq. Son anda məğlubiyyətdən qaça bildik və bir xal qazandıq. Halbuki, qələbə "İnter"lə oyuna daha yaxşı əhval-ruhiyyədə hazırlaşmağımıza kömək edə bilərdi. Bakılıları ev oyununda məğlub etməliyik ki, səfərə rahat yollanaq".

İsveç klubunun futbolçusu "İnter" barədə məlumatının olmadığını da etiraf edib: "Sadəcə, klubunuzun adını bilirəm. İtaliya və Finlandiyada da bu adda komanda olduğundan xəbərim var. Amma Azərbaycanda da bu adda komandanın olduğunu bilmirdim. İstənilən halda, rəqibə hörmətlə yanaşırıq. Bilirəm ki, ilk təsnifat mərhələsindəki rəqiblərin iki oyuna altı qol vurublar. Deməli, yaxşı hücum xətti olan komandadı. Həmin qollara baxmışam. Amma oyunlarını izləməmişəm".