Tuayev: Qarabağla Neftçi mərhələ keçməyə borcludu, İnterə çətin olacaq

Veteran futbolçu Kazbek Tuayevin azerisport.az saytına müsahibəsi

- Bu gün Azərbaycan çempionu "Qarabağ" Çempionlar Liqasında Malta "Valletta"sı ilə ilk oyuna çıxacaq. Nə gözləyirsiz? Keçə bilərik?
- Borcluyuq. "Qarabağ"ın başqa çıxış yolu yoxdu.

- Amma Qurban Qurbanovun danışından elə hiss olunur ki, Yunanıstan ya da Rumıniya klubuna qarşı mübarizə aparmalı olacaqlar...
- Bu, onun iş xüsusiyyətidi. Məşqçi ehtiyatlı olmalıdı. Çünki komandanı oyuna o hazırlayır. Oyuna da ehtiyatlı başlamaq lazımdı ki, rəqibin nə təklif edəcəyini biləsən. Ondan sonra oyun açılacaq.

- Az qala bütün ölkə Ağdam klubunun ÇL-də, ən azı Avroliqada qrupa düşməsini gözləyir...
- Uğurlar arzulayıram. Bunu hamımız istəyirik.

- Siz inanmırsız?
- Məsələ inamda deyil. Burada püşkün də az rolu yoxdu. "Qarabağ"ın hansı yolla irəliləyəcəyini, kimlərə rəqib olacağını indidən demək mümkünsüzdü.

- Bəs "İnter"lə "Neftçi"dən nə gözləmək olar?
- Hər iki komandanın mərhələ keçməsini gözləyirəm. "Neftçi" Sloveniya "Koper"ini mütləq keçməlidi, buna borcludu. "İnter" üçün çətin olacaq, amma "Elfsborq" keçiləsi rəqibdi. Bizim futbol da hazırda pis deyil. Artıq müəyyən uğurlar qazanmağın zamanıdı.

- "Qəbələ" isə debüt etdiyi avrokuboklarda startdaca uduzdu...
- 10 il əvvəl "Neftçi" mənim rəhbərliyim altında bu "Şiroki Briyeq"i keçmişdi. Həmin ilə hətta Moskva CSKA-sını da keçməliydik. Əgər o vaxt həmin komandanın baş məşqçisi Valeri Qazzayev olmasaydı, sizi əmin edirəm ki, biz onları məğlub edəcəkdik.