Elfsborqun hücumçusu: İnterin bizi üstələməsi inandırıcı görünmür

İsveçin "Elfsborq" klubunun hücumçusu Danii Mikkel Avropa Liqasının ikinci təsnifat mərhələsi çərçivəsində Bakı "İnter"inə qarşı keçirəcəkləri ilk oyun öncəsi azerisport.az saytının suallarını cavablandırıb.

- "İnter"in Moldova "Tiraspol"u ilə oyunlarına baxmısız?
- Vurulan qollara baxmışam. Amma bütöv oyuna yox.

- Bakı klubu barədə nə bilirsiz?
- "İnter" barədə məlumatım yoxdu. Amma mənim üçün çox maraqlı komandadı. Hiss olunur ki, hücuma daha çox diqqət ayıran komandadı. Onlarla oyunlarımız maraqlı olacaq.

- "Elfsborq" bu oyunlara necə hazırlaşır?
- Bizdə çempionatın qızğın dövrüdü. "İnter"lə oyuna 4 gün qalmış "Brommapoykarna" ilə qarşılaşdıq və 2:2 hesablı heç-heçə qeydə alındı.

- "İnter"in "Tiraspol"a 6 qol vurması sizi qorxutmur?
- Bizi? Yox. Biz heç kimdən qorxmuruq. Biz "İnter"i ikinci təsnifat mərhələsində gözləyirdik, onlar bizi yox. Amma təbii ki, rəqibə ciddi yanaşırıq. Biz öz ölkəmizi təmsil edirik, "İnter" də Azərbaycanı. "Elfsborq" ötən mövsüm Avroliqanın qrup mərhələsində çıxış edirdi.

- Komandanız cütün favoriti sayılır. Amma "İnter"in də hədəfi qrup mərhələsinə vəsiqə qazanmaqdı...
- Biz onların bu məqsədlərinə çatmasına imkan verməyəcəyik. Çünki "Elfsborq" yenidən qrup mərhələsində oynamaq istəyir.

- "Bankirlər"i nəyin sayəsində məğlub edə bilərsiz?
- Təcrübə və oyunumuz sayəsində.

- Yəni "İnter"in şansının olmadığını düşünürsüz?
- Əlbəttə, hər şey ola bilər. Bu, futboldu. Amma "İnter"in "Elfsborq"u üstələməsi inandırıcı görünmür. Növbəti mərhələyə biz adlayacağıq.

- İlk oyun İsveçdə olacaq. Bu, sizin üçün üstünlükdü?
- Biz hər şeyə ev oyununda aydınlıq gətirmək istəyirik ki, Bakıdakı oyuna rahat çıxaq.