Arif Daşdəmirov: Elfsborq Tiraspol deyil
"İnter"in müdafiəçisi Arif Daşdəmirov Avropa Liqasının birinci təsnifat mərhələsi çərçivəsində Moldova "Tiraspol"una qarşı keçirdikləri cavab matçından (3:1) sonra azerisport.az saytının suallarını cavablandırıb.
- Oyunla bağlı nə deyə bilərsiz?
- Ağır oyun oldu. Erkən qol buraxdıq. Ondan sonra bir müddət konsentrasiyanı itirdik. Amma əsas odu ki, gec də olsa, özümüzə gəldik və lazım olan qolları vurduq. Bununla da hər şey öz yerini tapdı. Çünki biz "Tiraspol"dan güclü idik.
- 70-ci dəqiqəyə qədər oyununuz alınmadı, real qol vəziyyəti yarada bilmirdiz. Amma sizdən hamı ev oyununda daha yaxşı oyun gözləyirdi...
- Mən deməzdim ki, biz 70-ci dəqiqəyə qədər oyunu boşa verdik. Sadəcə, oynamaq çətin idi. İsti qaçmağa imkan vermirdi. Həm də nəzərə almaq lazımdı ki, rəqib bura uduzmağa gəlməmişdi. Onlar oyuna çox aqressiv başladılar. Onlar mərhələ adlayacaqlarına inanırdılar.
- "İnter" fərqli düşünürdü?
- Yox, sadəcə, olanı deyirəm. Bizdə arxayınlıq yox idi. Hər şey istədiyimiz kimi alınmırdı.
- İlk cavab qolunu siz vurduz...
- Bu, mənim avrokuboklardakı ilk qolumdu. Neçə ildi oynayırdım, amma rəqib qapılarına yol tapa bilmirdim. Qol vurmağı çox istəyirdim. Şadam ki, buna nail oldum, qələbədə önəmli rol oynayan qolun müəllifi oldum. Bundan razıyam.
- Növbəti mərhələdə ötən mövsüm Avroliqanın qrup mərhələsində oynamış İsveç "Elfsborq"u ilə qarşılaşacaqsız. Bu oyunla nəyə ümid etmək olar?
- Şübhəsiz ki, növbəti rəqibimiz daha ciddi komandadı. Güclü hazırlaşmalıyıq. Təbii ki, daha da artırmaq lazımdı. Məncə, bizi bu oyuna görə çox mühakimə etmək lazım deyil. Çünki bu mövsümkü ilk ev oyunumuz idi.
- Onda tənqidləri ikinci təsnifat mərhələsindən sonraya saxlayaq?
- Ümid edirəm ki, bu tənqidlərə imkan verməyəcəyik (gülür). Hər şeyin normal olacağını düşünürəm. İlk oyunumuz da səfərdə olacaq.
- Səfərdə qələbə qazanmaq da planlarınıza daxildi?
- Pis olmazdı. İlk növbədə qol buraxmamağa çalışmalıyıq. Qol vursaq, daha yaxşı olardı. İkinci oyunda isə növbəti mərhələyə vəsiqənin taleyini həll edərdik. Amma unutmamalıyıq ki, "Elfsborq" "Tiraspol" deyil.
