Baçana Sxadadze: İlk dəfə penaltini vura bilmədim
"İnter"in hücumçusu Baçana Sxaadadze Avropa Liqasının birinci təsnifat mərhələsi çərçivəsində Moldova "Tiraspol"una qarşı keçirdikləri cavab matçından (3:1) sonra azerisport.az saytının suallarını cavablandırıb.
- Oyun haqda nə deyə bilərsiz?
- Oyun biz istəyən kimi başlamadı. Bu, bizim xeyrimizə deyildi. Amma tədricən oyuna nəzarəti ələ keçirdik. Hiss olunurdu ki, toparlanmağımız, öz oyunumuzu tapmaq üçün zamana ehtiyacımız var. Vacib qələbəydi.
- Məğlubiyyətdən yaxa qurtarmaq şansı qazandığınız bir vaxtda penaltini qaçırdız. Özü də qapıda qapıçı yox, meydan oyunçusu durmuşdu...
- Bu, karyeramda ilk belə hadisədi ki, penaltini vura bilmədim. Niyə elə alındığını deyə bilmərəm. Bəlkə də elə qapıda qapıçının yox, adi meydan oyunçusunun durması öz rolunu oynadı. Orada qapıçı olsaydı, bəlkə də mənim üçün daha rahat olardı.
- "İnter" bu oyunla nəyə ümid edə bilər?
- Biz daha da artırmalıyıq. İndi əsas olan mərhələ adlamağımızdı. Amma oyunumuzu da yaxşılaşdırmalıyıq.
- "Tiraspol"la cavab matçında əsas tapşırıq uduzmamaqla mərhələ keçmək idi, yoxsa mütləq qalib gəlmək?
- Biz qələbə üçün çalışırdıq. Çünki doğma meydanda oynayırdıq, azarkeşlərimiz, Azərbaycan naminə qələbə qazanmaq istəyirdik. Şadam ki, azarkeşlər də bu gün bizi dəstəksiz buraxmadılar. Düzdü, heç-heçə də bizə bəs edirdi, amma qələbə daha xüsusi hissdi.
- Qarşıda sizi İsveç "Elfsborq"u ilə duellər gözləyir...
- Sabahdan bu komandanı analiz etməyə başlayacağıq. Amma şübhəsiz ki, "Elfsborq" tam fərqli komandadı. Təbii ki, bu rəqiblə görüşlərdə də uğur qazanmağa çalışacağıq. Amma çətin olacaq.
- "Elfsborq" "Tiraspol"dan güclüdü?
- Bu komanda daim avrokuboklarda çıxış edir. Məlum təcrübələri var. Əlbəttə, çətin olacaq. Amma biz də Avroliqada mümkün qədər irəli getmək istəyirik.
