İki Türkiyə klubu Subaşiçi bölüşə bilmir

Futbol üzrə milli komandamızın sabiq üzvü Branimir Subaşiç özünə yeni klub tapıb. Azerisport.az xəbər verir ki, serb əsilli milliləşdirilmiş hücumçu bundan sonra Türkiyənin "Manisaspor" klubunda çıxış edəcək.
 
Lakin millimizin sabiq üzvünün "tarzanlar"ın heyətinə keçməsi qalmaqala səbəb olub. Belə ki, Branimir daha əvvəl "Bucaspor"ilə ilkin razılığa gəlmişdi. Ancaq onun son anda fikirindən daşınaraq "Manisaspor"a üz tutması bucalıların prezidenti Hüsnü Kayanı bərk əsəbləşdirib. O, bu transferin alınmamasına görə "Manisaspor"un prezidenti Abdulla Mergəni ittiham edib.
 
Kaya Subaşinin "Manisaspor" üz tutmasına belə reaksiya bildirib: "Bizim futbolçu ilə anlaşma əldə etdiyimizi bilə-bilə Subaşiçi Manisaya dəvət etdilər. Bu cür qeyri-etik davranışı qəbulolunmazdı. Biz hər hansı bir klubun razılaşdığı futbolçuya heç vaxt yaxın durmamışıq. "Manisaspor"un bu davranışını qınayıram. Hadisəni eşidər-eşitməz onların prezidentinə zəng etdim. O, isə Branimir Subaşiçi transfer etməyəcəyini bildirdi. Biz telefonla danışdıqdan sonra isə Subaşiçi rənglərinə bağlayıblar. Bizim artıq "Manisaspor"la heç bir dostluq əlaqəmiz qalmayıb. Gözümüzün içinə baxa-baxa yalan danışırlar. Subaşiçin bizimlə anlaşdıqdan sonra başqa bir kluba üz tutması da ayıbdı. Bizə futbolçunun bacarıqlı olması ilə yanaşı, xarakterli olması da vacibdi".
 
"Manisaspor"un prezidenti Abdullah Mergən isə qarşı tərəfin reaksiyasına daha sərt münasibət bildirib: "Bucaspor" bu futbolçu ilə anlaşıbsa, Subaşiç niyə başqa komandaya üz tutur? Mən ona "Subaşiçi transfer etməyəcəyik" deməmişəm. Bu məsələdə menecerlərin oyunu var. Sən demə, dostluğumuz bir ipdən asılıymış. Belə dostluq olar? Biz də bu cür hadisə ilə üzləşmişik. Ancaq həmin vaxt bizimlə anlaşan futbolçu başqa komandaya keçəndə ona "xeyirli olsun!" dedik".
 
Qeyd edək ki, Subaşiç ötən mövsümü Türkiyənin "Orduspor" klubunda keçirmişdi.