Azerbaijan Land of Fire Şeffild Uensdeyin sponsoru oldu

İngiltərə çempionşipində çıxış edən "Şeffild Uensdey" klubunun yeni mövsüm üçün titul sponsoru müəyyənləşib. Azerisport.az xəbər verir ki, bu, gözlənildiyi kimi, Azərbaycanın "Azerbaijan Land of Fire" reklamı olacaq. Hansı ki, İspaniyanın "Atletiko" və Fransanın "Lans" klublarının da titul sponsorudu məhz budu.

Klubun sahibi, azərbaycanlı biznesmen Hafiz Məmmədov bu anlaşma ilə bağlı açıqlamasında bunları söyləyib: "Bu, həm mənim, həm də ölkəm üçün mühüm gündü. "Azerbaijan Land of Fire" və İngiltərənin böyük tarixə malik klubu arasındakı bu nigah bizi sevindirməyə bilməz. Bundan öncə biz "Lans" və "Atletiko" klubları ilə oxşar müqavilə imzalamışdıq. "Şeffild Uensdey"lə müqavilə isə bizi vaxtiı futbolun doğulduğu ölkəyə bir qədər də yaxın etdi".

"Şeffild Uensdey" klubunun prezidenti Milan Mandariç də imzalanma mərasimində danışıb: "Azerbaijan Land of Fire" şüarının klubumuzun titul sponsoru olmasını bəyan etməkdən qürur duyduğumuzu demək istərdim. "Atletiko" və "Lans" klublarının istifadə etdiyi brenddən yararlanmaq bizi yeni səviyyəyə qaldıracaq. Əminəm ki, oyunçularımız bu reklamların həkk olunduğu formalarla yaxşı nəticələr qazanacaqlar". (klub saytı)