Bakı təlim-məşq toplanışına gedəsi olmadı

Maliyyə problemini həll edə bilməyən "Bakı" yeni mövsümün hazırlıqlarına başlasa da, klubun gələcəyi hələ də müəmmalıdır. Azerisport.az xəbər verir ki, komandanın futbolçulara olan borcu həftəsonuna qədər ödənilməlidi.

Rəhbərlik məvaciblərin tez bir zamanda ödəniləcəyini bildirib. Artıq məlumdu ki, "Bakı" Avstriyaya yollanmayacaq. Maliyyə probleminin olması, üstəlik heyətin əksər oyunçularının komandanı tərk etməsi səfərə çıxmaq planını dəyişib. Hazırda paytaxtda məşqləri davam etdirən "zolaqlılar"ın heyətində əsasən yerli futbolçulardı. Bakı Futbol Akademiyasının 15 üzvü əsas komandayla məşqlərdə iştirak edir. Onların yeni mövsüm çempionatda iştirak edəcəyi gözlənilir.

Gələn həftə "Bakı" yoldaşlıq matçı keçirməyi düşünür. Yerli klublarla qarşılaşmağı planlaşdıran "zolaqlılar" hələlik, rəqib axtarışındadı.

Baş məşqçi Milinko Pantiçin "Bakı"dan getməsi dəqiqdi. Maliyyə probleminin həll olunmadığını görən məşqçi köməkçilərini də geri çağırıb. Komandaya kimin rəhbərlik edəcəyi sual altındadı. "Bakı" rəhbərliyi bir neçə yerli məşqçinin namizədliyi barədə müzakirələr aparır. Hazırda komandaya əvəzedicilərin baş məşqçisi İbrahim Uzunca məşq keçir. Onun nə vaxta qədər əsas komandaya hazırlıq keçəcəyi məlum deyil.