Tahir Süleymanov: Oyun danışılmışdısa, UEFA ciddi qərarlar qəbul etməlidi

Azərbaycan Kubokunun qalibi "Neftçi"nin vitse-prezidenti Tahir Süleymanovun azerisport.az saytına müsahibəsi

- Avropa Liqasının ikinci təsnifat mərhələsindəki potensial rəqiblərinizin - Sloveniya "Koper"i ilə Monteneqro "Çelik"inin ilk oyununun danışılmış olmasına dair fikirlər səsləndirilir. Sizin klubda bu məsələ ilə bağlı nə düşünürlər?
- Əgər bu oyun danışılmışdısa, bu, Avropa futbolu üçün çox mənfi haldı. Burada məsələ heç də bu komandaların bizim rəqiblərimiz olmasında deyil. UEFA bu məsələni mütləq ciddi araşdırmalı və iddialar əsasını taparsa, sözügedən klubları, ümumiyyətlə belə yollara əl atan komandaları cəzalandırmalıdı. Amma "Neftçi" bu məsələyə qarışmayacaq. Qoy bununla UEFA özü məşğul olsun.

- Amma "Neftçi"ni bu komandaların cəzalandırılması qane edir. Çünki belə olacağı halda oynamadan üçüncü təsnifat mərhələsinə vəsiqə qazana bilərsiz...
- Əgər doğrudan da belə bir məsələ varsa, UEFA hər iki klubu cəzalandırmalıdı. Futbolda təmizlik olmalıdı.

- Yeni mövsümə hazırlıq necə gedir?
- Plan üzrə hazırlaşırıq. Bu gün sonuncu yoxlama oyunumuz olacaq. Ayın 10-da isə vətənə qayıdacağıq. Avropa Liqasının hazırlığını Bakıda davam etdirəcəyik.

- Komandadan yeni mövsümdə nə gözləyək?
- 2012/13 mövsümündə Avroliqadakı uğurlu çıxışın ardından ötən mövsüm Albaniya klubunu məğlub edə bilməməyimiz mənfi haldı. Bu üzdən bizim Azərbaycan futbolu qarşısında borcumuz var. Ona görə bu mövsüm özümüzü ən yaxşı tərəfdən göstərməyə çalışacağıq. Bütün azarkeşləri "Koper"lə ilk matçımıza səsləyirəm. İnanıram ki, biz yaxşı futbol göstərə, müsbət nəticə qazana biləcəyik.

- Yeni transferlər baxımından nə yenilik var?
- Biz artıq heyəti tam komplektləşdirmişik və transfer çalışmalarımızı tamamlamışıq. Kifayət qədər yaxşı legionerlərimiz, gənc futbolçularımız var. Fikrimcə, onların timsalında yaxşı komanda görə biləcəksiz.