Dorinel Muntyanu: Növbəti mərhələyə vəsiqə qazanmağa çalışacağıq
"Qəbələ"nin baş məşçqisi Dorinel Muntyanu Avropa Liqasının birinci təsnifat mərhələsi çərçivəsində Bosniya və Herseqovina "Şiroki Briyeq"i ilə cavab oyunu öncəsi fikirlərini açıqlayıb. Azerisport.az xəbər verir ki, rumıniyalı mütəxəssis öncə bunları dilə gətirib:
"İlk oyunda 2 cavabsız qolla uduzduğumuza görə, hazırda cütün favoriti "Şiroki Briyeq"di. Amma qeyd etməliyəm ki, bosniyalıların hər iki qolu bizim öz səhvlərimiz nəticəsində vuruldu. Buna baxmayaraq, sabah biz sona qədər mübarizə aparmağa çalışacağıq. Bir qədər qəribə də səslənsə, deməliyəm ki, növbəti mərhələyə vəsiqə qazanmağa cəhd göstərəcəyik".
Muntyanu ilk oyunda buraxılan səhvlərdən də danışıb: "İlk oyunu yaxşı analiz etmişik. Özüm üçün belə nəticə çıxardım ki, məğlubiyyətin günahkarı özümüzük. Həmin səhvləri bir daha təkrarlamamalıyıq. Əgər bunu bacarsaq, növbəti mərhələyə çıxmaq şansımız olacaq. İtiriləsi heç nəyimiz yoxdu. Buna görə də hücum haqda daha çox düşünəcəyik".
"Qəbələ"nin çalışdırıcısı rəqib komandanı da dəyərləndirib: "Rəqibimiz yaxşı təşkilatlanmış komandadı. Amma "Şiroki Briyeq"in heyətində kimisə xüsusi fərqləndirmək istəməzdim. Onların hansı futbolçusunu "Qəbələ"də görmək istərdim? Bir daha qeyd edirəm ki, Bosniya təmsilçisi yaxşı komandadı və heyətində kimisə fərqləndirmək düzgün olmazdı".
