"Abdullayev Almaniya Bundesliqasında rahatlıqla oynaya bilər"

Almaniyanın "Dinamo" (Drezden) klubunun hücumçusu Silvano Komvaliusun azerisport.az saytına müsahibəsi

- "Neftçi" ilə yoxlama oyunu barədə (2:1) nə deyə bilərsiz?
- Çox yaxşı oyun oldu. "Neftçi" ilə matç bizə çox şey öyrətdi. Yaxşı test idi.

- Hesabı "Neftçi" açsa da, qələbə sizə qismət oldu. Hansı komanda daha yaxşı idi?
- Mən düzünü deyəcəm. Qələbə bizimləydi. Amma sərgilədiyimiz futbol o qədər də yaxşı deyildi. Deməzdim ki, biz həmin oyunda qələbəyə layiq idik.

- Bəs qələbəni nəyin sayəsində qazandız?
- "Neftçi"nin müdafiəsindəki səhvlərdən yararlandıq. Komandanızın yaxşı yarımmüdafiə, hücum xətti, güclü qapıçısı var. Amma müdafiəçilər hərdən səhvə yol verirlər. Mənə elə gəlir ki, "Neftçi" müdafiəsini gücləndirməlidi.

- "Neftçi"nin futbolçularından hansı yadınızda qaldı?
- 7 nömrə (Araz Abdullayevi nəzərdə tutur - red.). O, ispandı, ya latın amerikalı?

- Xeyr, azərbaycanlı futbolçudu?
- Doğrudan? Bilmirdim. Onun əla sol ayağı var. Azərbaycanda belə futbolçu olduğunu bilməzdim. O, rahatlıqla Almaniya Bundesliqasında çıxış edə bilər.

- Bəs "Neftçi"nin Avropa Liqasındakı şansları barədə nə deyə bilərsiz?
- Bizə qarşı yaxşı oynadılar. Əgər elə oynasalar, müdafiədə az səhv buraxsalar, qrup mərhələsinə vəsiqə qazana bilərlər. Mən də "Neftçi"də oynamaq istərdim. Çox yaxşı kollektivi var.