Sxadadze: Biz Tiraspolun Bakıda möcüzə etməsinə imkan verməyəcəyik

"İnter"in hücumçusu Baçana Sxadadzenin azerisport.az saytına müsahibəsi

- Avropa Liqasının ilk təsnifat mərhələsindəki rəqibinizə - Moldova "Tiraspol"una səfərdə 3:2 hesabıyla qalib gələcəyinizi gözləyirdiz?
- Biz bu oyuna çox yaxşı başladıq. Nəticədə iki qol vurduq. Pis olan odu ki, biz üç qol vurduqdan sonra öz qapımızda iki top gördük. Amma, yenə də nəticəni normal sayıram.

- Niyə 3:0-dan sonra komanda hücumlarına ara verdi? Baş məşqçinin tapşırığı eləydi?
- Xeyr, belə bir tapşırıq almamışdıq. Sadəcə, oyun elə alındı. Arxayınlaşmışdıq. Növbəti oyunda daha yaxşı çıxış etməliyik. Çünki hamı bizdən bu rəqibi keçməyi gözləyir.

- Tiraspollular belə hesab edirlər ki, oyun daha 10 dəqiqə davam etsəydi, onlar hesabı bərabərləşdirə də bilərdilər...
- 90 dəqiqə onlara bəs etmir ki? (gülür) Biz əslində onlara dörd qol vurmuşduq, amma hakim onların birini qeydə almadı. Qoy necə istəyirlər, düşünsünlər. Cavab oyunu da olacaq, hər şeyə orada aydınlıq gələcək.

- Necə oynamağı düşünürsüz?
- Bakıdakı oyunda da qələbə qazanmaq istəyirik. Öz futbolumuzu oynayacağıq. İnanıram ki, azarkeşlər də çox olacaq. Onların hər biri bizə çox böyük kömək olacaq.

- Sizcə, moldovalılar Bakıda möcüzə edə biləcək gücdədilər?
- Onlara bunu gerçəkləşdirmək çətin olacaq. "Tiraspol" adi rəqib deyil. Amma biz onların buradan qələbə qayıtmasına imkan vermərik.

- "İnter" Avroliqada belə oyunla nəyə nail ola bilər?
- Biz oyundan-oyuna daha da artırmalıyıq. Bu mərhələni keçək, sonrasına baxarıq.

- Sizə komandanın demək olar ki, yeganə hücumçusu olmaq çətin olmayacaq ki?
- Yüksək səviyyəli futbolçularımız nə qədər çox olsa, bir o qədər yaxşıdı. Rəqabət bizi daha da güclü edir. Odu ki, yeni hücumçunun gəlməsi pis olmazdı.