Cavid Hüseynov: Qəbələdə də İnterin təklif etdiyi qədər alacam

"Qəbələ"nin yeni transferi Cavid Hüseynovun azerisport.az saytına müsahibəsi

- Hamı sizin "İnter"ə keçəcəyinizi gözləyirdi, amma "Qəbələ"də peyda olduz. Buna nə səbəb oldu?
- Biz Elvin Məmmədovla yaxın dostuq. "Bakı"da eyni mövqedə oynayırdıq. "İnter"in prezienti ilə görüşdən sonra evə gedib, düşündüm. Bu təklifdən imtina etmək çətin idi, amma mən Bakı klubuna keçməkdən imtina etdim. Yenidən Elvinlə rəqabətə girmək istəmədim.

- Elvinlə bu barədə söhbətiniz olmuşdu?
- Xeyr. O, bu barədə mənə heç nə deməyib. Elə insan da deyil. Mən özüm belə qərara gəldim. Əksinə, o, mənim də "İnter"ə keçməyimi istəyirdi. Məni inandırmağa çalışırdı ki, fərqli mövqelərdə meydanda ola bilərik. Amma mən risk etmək istəmədim.

- Və belədə "Qəbələ"dən zəng gəldi?
- (gülür) Bəli, zəng etdilər. Çox düşünmək istəmədim. Bu, mənim üçün yaxşı variant idi. "Qəbələ" yaxşı komandadı.

- Yəqin ki, maliyyə baxımından da sərfəli olar...
- "Qəbələ"də də "İnter"in təklif etdiyi qədər qazanacam. Qəpik də artıq deyil.

- Amma "Şiroki Briyeq"ə qarşı cavab oyununda meydana çıxa bilməyəcksiz...
- Mən komanda ilə birgə Bosniya və Herseqovinaya gedəcəm. Amma meydanda olmayacam. Ümid edirəm ki, "Qəbələ"yə keçidim bu komandaya düşərli olar və cavab matçında uğur qazanarıq.