Asim Xudiyev: UEFA məni Ermənistana göndərə bilmədi

Xəbər verdiyimiz kimi, azərbaycanlı hakim-inspektor Asim Xudiyev Avropa Liqasının birinci təsnifat mərhələsinin cavab oyunu çərçivəsində Qazaxıstan "Astana"sı ilə Ermənistan "Pünik"i arasındakı matçın hakim-inspektoru təyin olunub. Azerisport.az saytına açıqlamasında mütəxəssis bu təyinatına belə münasibət bildirib:

"Bu təyinat məni təəccübləndirmədi. UEFA-nın adi təyinatıdı. Məni Ermənistana göndərə bilməmişdilər, görünür, cavab qarşılaşmasına təyin etməyə qərar veriblər. Ona görə də buna normal yanaşıram. İlk dəfədi ki, azərbaycanlı hakim-inspektor Ermənistan klubunun oyununa təyinat alır. Belarusdan olan hakimlərin işinə qiymət verəcəm. Çətin ki, ermənilərin hakimliklə bağlı hansısa narazılığı olsun. Çünki ev oyununda 1:4 hesabıyla uduzublar".

Qeyd edək ki, cavab qarşılaşması iyulun 10-da Qazaxıstanda keçiriləcək.