Nicat Qurbanov: Koperin 5:0 hesablı qələbəsi bizi qorxutmadı, sadəcə, təəccübləndirdi
"Neftçi"nin yarımmüdafiəçisi Nicat Qurbanovun azerisport.az saytına müsahibəsi
- "Neftçi" Avropa Liqasının ikinci təsnifat mərhələsində "Çelik" (Monteneqro) - "Koper" (Sloveniya) cütünün qalibi ilə qarşılaşacaq. Sloveniya təmsilçisinin ilk oyunda səfərdə 5:0 hesabıyla qalib gələcəyini gözləyirdiz?
- Xeyr. "Koper" bu qələbəsiylə göstərdi ki, bizim üçün ciddi rəqibdi. Gözəl başa düşürük ki, bizi asan sınaq gözləmir. Ciddi hazırlaşırıq.
- 5:0 sizi qorxutmur?
- Xeyr, sadəcə, təəccübləndik. Əlbəttə, futbolda möcüzələr də olur, amma əminəm ki, biz məhz "Koper"lə qarşılaşacağıq. Futbolda qorxmaq lazım deyil. Səviyyə fərqi ola bilər. Amma "Koper"in "Neftçi"ni üstələdiyini düşünmürəm.
- Səudiyyə Ərəbistanı təmsilçisi "Əl Kadisiya" ilə görüşdə qol vurdunuz, komandanız 3:1 hesabıyla qalib gəldi...
- Buna çox sevindim. Çünki həmi qol komandamın qələbəsində müəyyən rol oynadı. Bu, əsasdı.
- Bəs Kiyev "Dinamo"su ilə matç (2:2) barədə nə deyə bilərsiz?
- Biz bu görüşə yaxşı başladıq. Amma müəyyən səhvlərə yol verdik ki, nəticədə iki qol buraxdıq. Xoşbəxtlikdən bu qolların əvəzini çıxa bildik. Tez özümüzə gəldik. Fikrimcə, yaxşı nəticə əldə etdik. Sərgilədiyimiz oyun da gələcəyə optimist baxmağa imkan verir.
- Müdafiədəki səhvlərə rəğmən?
- Biz hazırda toplanışdayıq, burada səhvlər adi şeydi. Rumıniyanın "Botoşani" klubuna da ona görə uduzduq. Əsas odu bu səhvləri rəsmi oyunlarda buraxmayaq. Həm də "Koper"lə oyunda məsuliyyət, oyuna köklənmə tam fərqli olacaq. Müdafiə xəttimizin həmin oyunlarda belə səhvlər buraxacağını düşünmürəm.
- Komandanızı Avroliqaya tam hazır hesab etmək olar?
- Hələ hazırlaşırıq. Bütün cəhdlərimiz buna yönəlib.
- "Neftçi" yenidən Avroliqanın qrup mərhələsinə vəsiqə qazana biləcək?
- "Neftçi"nin hədəfləri həmişə yüksək olub. Azarkeşlərin bizdən nə gözlədiyini də gözəl başa düşürük. Biz özümüz də eyni sevinci yenidən yaşamağı çox istəyirik. Məsələn, mən özüm həmin vaxt komandada deyildim. Ona görə də yenidən qrup mərhələsinə vəsiqə qazansaq, bu, mənim karyeramda ilk belə uğur olacaq.
