Dmitri Kramarenko: Kamran Ağayevin buraxdığı qol mənim səhvimdi
"Qəbələ"nin qapıçılarla işləyən məşqçisi Dmitri Kramarenko azerisport.az saytının suallarını cavablandırıb. O, Avropa Liqasının birinci təsnifat mərhələsi çərçivəsində ötən gün baş tutan Bosniya və Herseqovina "Şiroki Briyeq"i ilə ilk oyunu şərh edib, Kamran Ağayevin səhvindən danışıb.
- Komandada atmosfer necədi?
- Tədricən məğlubiyyətdən ayılmağa çalışırıq. Hazır olmadığımızı deyirlər. Amma mən bununla razı deyiləm. Mənə elə gəlir ki, komanda sadəcə, özünü yandırdı. Rəqib komanda avrokuboklardakı təcrübəsinin hesabına bizi üstələdi. Digər tərəfdən bu yay komandanı xeyli futbolçu tərk etmişdi. Onların yoxluğunu hiss etdirməmək mümkün olmadı.
- Siz də möcüzəyə inanırsız?
- Hesab edirəm ki, ən azından əlimizi yanımıza salmağın mənası yoxdu. Çətinliklər komandanı daha da möhkəmləndirməlidi. "Qəbələ" bu çətin dövrü geridə qoymağa borcludu.
- Komanda növbəti mərhələyə adlaya bilməsə, məşqçilər korpusunun istefası mümkündü, yoxsa bu, ümumiyyətlə müzakirə olunmur?
- Bundan danışmağın heç mənası da yoxdu. Muntyanu cəmi 2 həftədi komandayla birgədi. Komandanı Marat İzmaylov, Daniel Subotiç, Lorenso Ebesilio, Leonardo da Silva, İbrahima Niasse kimi aparıcı futbolçular tərk edib. Şübhəsiz ki, bunların hamısı subyektiv amillərdi. Burada yeni komanda yaradılır. Əlbəttə, doğma meydanda yaxşı oynamağa borclu idik. Baş məşqçi əbəs yerə məsuliyyəti öz üzərinə götürmədi. Oyunçular da əllərindən gələni etdilər. Sizi bir şeyə əmin edə bilərəm ki, Sarayevoya gəzintiyə getməyəcəyik.
- İlk qolla bağlı nə deyə bilərsiz? Azərbaycan yığmasının qapıçısı belə bir qol buraxmalı idimi?
- Buraxılan hər bir qol qapıçının səhvidi. Kamran Ağayevin, Anar Nəzirovun qol buraxması eyni zamanda da mənim səhvimdi. Amma bütün günahı Kamranda görmək də lazım deyil. Biz birgə çalışırıq, birgə uğur qazanır və ya uduzuruq.
- Amma həmin epizod zamanı çətin ki, sizi xatırlayan olardı...
- Nə etmək olar ki? Belə səhvləri Kasilyas, Akinfeyev də edir. Özü də Avroliqanın təsnifat mərhələsində yox, dünya çempionatlarında. Kamran özü də hər şeyi başa düşür. İndi ona dəstək olmağımız lazımdı.
