Muntyanu: "Səfərdə möcüzə etməliyik"
"Qəbələ"nin baş məşqçisi Dorinel Muntyanu Avropa Liqasının birinci təsnifat mərhələsi çərçivəsində Bosniya "Şiroki Briyeq"i ilə ilk oyundan sonra fikirlərini açıqlayıb. Azerisport.az xəbər verir ki, o, 0:2 hesablı məğlubiyyətdən sonra öncə bunları dilə gətirib:
- Oyunumuz alınmadı. Bütün məsuliyyət mənim üzərimdədi. İstər stadiona gələn, istərsə də oyunu televiziya vasitəsilə izləyən bütün azarkeşlər qarşısında üzr istəyirəm. Rəqibimizin bizdən fərqli formalaşmış heyəti var. Qarşıda cavab oyunu var, çalışacağıq ki, həmin oyunda möcüzəyə nail olaq. Futbolçularıma təşəkkür edirəm, çox çalışdılar, özlərini göstərmək arzuları vardı.
- Püşkatmadan sonra demişdiz ki, rəqiblə problem olmayacaq, onları keçə biləcəksiz...
- Mən elə söz deməmişəm. Demişdim ki, bu rəqibi keçmək üçün əlimizdən gələni edəcəyik. Sadəcə, bu gün bizim günümüz deyildi.
- Komandada hansı problemlər sizi narahat edir?
- İndi hazırlıq dövründəyik. İlk növbədə onu demək istəyirəm ki, bu nəticəyə görə cavabdeh mənəm. Bizim cəmi iki həftə hazırlıq vaxtımız vardı. Gördüyünüz kimi, birinci hissədə bərabər mübarizə gedirdi. Amma ikinci hissədə fiziki cəhətdən hazır olmadığımız üzə çıxdı. Eyni zamanda ehtiyat oyunçular skamyamız qısadı.
- Kimləri yola salmaq, hansı mövqelərə əlavə oyunçular almaq lazımdı?
- Heyətlə bağlı vəziyyəti rəhbərliklə müzakirə etmişik. Hələ az oyunçumuz var. Belə bir məğlubiyyətdən sonra kimlərin lazım olub-olmadığını deyə bilmərəm.
- Məğlubiyyətə görə məsuliyyəti üzərinizə götürdünüz. Səhvi siz etdiz, ya oyunçular?
- Baş məşqçinin yetirmələrini müdafiə etməsi normaldı. Sözümün də üstündə dururam.
- Bəs bu məğlubiyyətin cəzası nə olacaq?
- Öncə oyunu yaxşıca analiz etmək lazımdı. Bu, sabah olacaq. Cəzaya gəlincə, gedib başımı kəsəcəm.
- Ruslan Abışovun oyununu necə qiymətləndirirsiz?
- Onun hazırlığından çox razıyam. Nəzərə almaq lazımdı ki, o, uzun müddətdi oyun təcrübəsi qazanmırdı.
- Cavab matçında sizə möcüzə ilə yanaşı daha nə lazım olacaq?
- Sarayevoya qələbə dalınca gedəcəyik. Amma biz həm də çempionata hazırlaşmalıyıq.
