Dodo: Muntyanu məni əvvəlki mövqeyimə qaytardı
"Qəbələ"nin yarımmüdafiəçisi Dodonun azerisport.az saytına müsahibəsi
- Yeni baş məşqçiniz Dorinel Muntyanu necədi?
- Onun işə yanaşması, komanda ilə münasibəti, tələbkarlığı xoşuma gəlir. İlk gündən komandanı idarə etməyi bacardı. Elə bir təəssürat var ki, sanki buradakı ilk mövsümü deyil.
- Sloveniya toplanışı sizdə belə təəssürat yaratdı?
- Belə görünür ki, hə (gülür). Nəzərə alsaq ki, vaxtımız çox az idi, Sloveniya toplanışı Avropa Liqasına hazırlıq baxımından bizim üçün çox vacib idi. 100 faiz hazır olduğumuzu deməzdim, amma, maksimum hazırlaşmışıq.
- Komandaya iki yerli, bir o qədər də əcnəbi futbolçu cəlb olunub. Yeni transferlərlə bağlı fikriniz necədi?
- Onların güclü futbolçu olduqlarına şübhə etmirəm. Amma onların komandamıza nə dərəcədə faydalı olacağına rəsmi oyunlar aydınlıq gətirəcək. Yoxlama oyunlarına əsasən nəsə demək çətindi. Əminəm ki, bizə faydalı olacaqlar.
- "Şiroki Briyeq"lə oyundan nə gözləyirsiz?
- Şəxsən mənə elə gəlir ki, bu komandanı keçməyə borcluyuq. Ən azından ona görə ki, rəqibimiz nə "Barselona", nə də "Real"dı.
- Amma "Qəbələ" də "Bavariya" və "Borussiya" deyil...
- (gülür) Elədi. Amma belə hesab edirəm ki, biz ilk mərhələni keçməliyik. Aydın məsələdi ki, rəqib də eyni şeyi çox istəyir. 11 nəfər 11 nəfərə qarşı oynayacaq, şanslar bərabərdi.
- Mərhələ keçmək üçün Qəbələdəki oyunu yüksək səviyyədə keçirmək lazımdı...
- Çox şadam ki, avrokuboklardakı debüt matçımızı doğma stadionumuzda keçirəcəyik. Bu, Qəbələ üçün böyük hadisədi. Ümid edirəm ki, yaxşı dəstək sayəsində qələbə qazana biləcəyik.
- Yuri Syominin rəhbərliyi altında daha çox müdafiəyəmeylli çıxış edirdiz. Yeni baş məşqç ilə necə olacaq?
- Muntyanu Syominin imtina etdiyini etdi. O, məni yenidən əvvəlki mövqeyimə qaytardı. Bundan sonra mən daha çox yaradıcılıqla məşğul olacam, dağıdıcıqla yox. Dodo qayıdır (gülür). Ümid edirəm ki, Avroliqada komandama faydalı olacam.
- Mümkündü ki, komandanızın debüt oyununda məhz siz qəhrəman olasız...
- İnşallah! Debütdə qələbə qazanmağımız yaxşı olardı.
