Elnur Allahverdiyev: Şiroki Briyeqə ilk oyunda 3 cavabsız qol vurmaq pis olmazdı
"Qəbələ"nin müdafiəçisi Elnur Allahverdiyevin azerisport.az saytına müsahibəsi
- İlk növbədə Sloveniya toplanışı barədə fikirlərinizi bilmək istərdik...
- Bizim üçün vacib dönəm idi. Çünki yeni baş məşqçimizlə məhz bu toplanış zamanı tanış olduq. Toplanış ağır keçdi. Vaxt az olsa da, ondan yaxşı yararlandıq.
- Komandanı çoxlu futbolçu tərk edib. Xüsusilə hücum xəttinin aparıcı üzvləri olan Daniel Subotiçlə Lorenso Ebesilionun gedini qeyd etmək lazımdı. Çətin olmayacaq?
- Digər futbolçular da hamısı yaxşı oyunçular idi. İstəməzdim ki, komandamızı tərk etsinlər. Amma digər tərəfdən onlar gedibsə, deməli, belə lazım imiş. Əvəzində "Qəbələ"yə 3 yeni futbolçu gəlib. İki rumın oyunçunu - Adrian Ropotanla Andrey Kristeanı xüsusi qeyd etmək istəyirəm. Son yoxlama oyunu da göstərdi ki, onlar yaxşı icraçıdılar. Fikrimcə, onların sayəsində Subotiçlə Ebesilionu unuda biləcəyik.
- Amma komandanızın ilk dəfə qatıldığı Avropa Liqasında debüt matçına çıxmasına cəmi bir neçə gün qalıb...
- Hə, əlbəttə, bu, bizim üçün mənfi haldı.
- "Şiroki Briyeq"lə oyunlarda komandanızın şanslarını necə qiymətləndirirsiz?
- Bu cütdə favorit yoxdu. Avrokuboklarda debüt edəcəyik. Buna baxmayaraq, "Qəbələ" birinci mərhələni keçməlidi. İstəmirəm desinlər ki, elə startdaca uduzdular. İlk avrokubok mövsümümüzdə yaddaqalan çıxış etmək istəyirik.
- Görüşün Qəbələdə keçirilməsi sizin üçün böyük üstünlükdü?
- Bu, ciddi üstünlükdü. Doğma meydanda, doğma azarkeşlərin gözü önündə oynamaq həmişə əlavə üstünlük verir. Həm də bütün mövsümü bu meydanda çıxış etmişik.
- İlk oyunda sizi hansı nəticə qane edəcək?
- "Xəzər Lənkəran"a qarşı kubokun yarımfinalındakı ilk oyunumuzu xatırlayırsız?
- "Qəbələ" ilk oyunda 3:0 hesabıyla qalib gəlmişdi...
- Bax elə bir qələbə qazanıb, Bosniyaya sakit yollanmağımız pis olmazdı. Bu, ideal nəticədi. Amma 2:0 da yaxşı nəticə olardı. Əsas qol buraxmamaqdı. Hətta 0:0 hesabı da səfər oyunu öncəsi üstünlük sayılır.
