Vaqner Laqo: İlk oyunun Qəbələdə olması bizim üçün üstünlükdü
Bosniya və Herseqovina "Şiroki Briyeq"inin hücumçusu Vaqner Laqonun azerisport.az saytına müsahibəsi
- Avropa Liqasının birinci təsnifat mərhələsində "Qəbələ" ilə mübarizə aparacaqsız. Püşkün nəticəsini necə qarşıladız?
- Püşkün nəticəsinin bizim üçün kifayət qədər uğurlu olduğunu deyə bilərəm. Amma "Qəbələ" haqda heç bir məlumatımız yoxdu. Çox çətin olacaq. Azərbaycan çempionatının səviyyəsi yüksəkdi.
- Azərbaycan klubu haqda heç nə bilmirsiz?
- Müəyyən bildiklərimiz var. Məsələn, Dodo ilə yaxşı tanışam. "Dinamo"da birgə çıxış etmişik.
- İlk oyunun Azərbaycanda keçirilməsi sizin üçün üstünlükdü?
- Əlbəttə. "Qəbələ" avrokuboklarda ilk dəfə iştirak edəcək. Amma bizim bu turnirdə müəyyən təcrübəmiz var. Baxmayaraq ki, bunun bizə çox köməyinin dəyəcəyini düşünmürəm.
- "Şiroki Briyeq" favoritdi?
- Xeyr. Şanslar bərabərdi.
- Yəqin ki, "Qəbələ"nin yeni baş məşqçisi Dorinel Muntyanunu yəqin ki, yaxşı tanıyırsız...
- Bəli, onu bütün Bosniya tanıyır. Kristea ilə Ropotanı da tanıyıram. Amma mənə elə gəlir ki, hətta ən yüksək səviyyəli məşqçi və oyunçulara da uyğunlaşmaq üçün vaxt lazımdı.
- Çempionluğu son turda əldən verən komandanızda hazırkı vəziyyət necədi?
- Fikrimcə, çox yaxşı komandamız var. 25-ci turda "Jrinski" ilə oynayırdıq. 82-ci dəqiqəyə qədər 2:0 hesabıyla öndə olsaq da, qalan dəqiqələrdə 3 top buraxaraq məğlub olduq. Bu üzdən də ikinci olduq.
- Yarımmüdafiəçi olsaz da, son mövsüm Bosniya çempionatının bombardiri oldunuz...
- Mən hücumameylli yarımmüdafiəçiyəm. Hücumların təşkilində elə hücumçular qədər fəal iştirak edirəm. Mövsüm mənim üçün gözəl alındı. Amma Avropa Liqasında da qol vurmaq istəyirəm.
