Andrey Kristea: Bunun bəhrəsini gələn həftə görəcəyik
"Qəbələ"nin yeni transferi Andrey Kristeanın azerisport.az saytına müsahibəsi
- "Qəbələ"ni Avropa Liqasında Bosniya və Herseqovina "Şiroki Briyeq"i ilə duel gözləyir...
- Bu barədə çox danışmaq istəmirəm. Sadəcə, onu deyə bilərəm ki, "Şiroki Briyeq" ciddi rəqibdi. Hər şeyə gələn həftə aydınlıq gələcək.
- "Qəbələ" Avropa Liqasında ilk dəfə çıxış edəcək. Buna baxmayaraq, debütdəki uğursuzluq faciə sayılacaq?
- Mən futbola fərqli baxıram. Burada hər şey baş verə bilər. Amma unutmamalıyıq ki, faciə ancaq müharibələrdə olur. Biz isə müharibə etmirik. Bu, futboldu. Oyuna yaxşı hazırlaşırıq. Bunun bəhrəsini gələn həftə görəcəyik.
- Vaxtilə Buxarest "Dinamo"sunda, "Styaua"da, Almaniya "Karlsrue"sində çıxış etmisiz. "Qəbələ"ni nə əcəb seçdiniz?
- Dorinel Muntyanu məni öz komandasında görmək istəyirdi. Söhbətləşdik, razılaşdıq və Azərbaycanda oynamağa qərar verdim. Ölkənizdə futbol yaxşı səviyyədədi. "Qəbələ" növbəti mövsümdə əvvəlkindən də yaxşı çıxış edəcək.
- Muntyanu barədə nə deyə bilərsiz?
- O, hazırda Rumıniyanın hazırda ən yaxşı məşqçilərindən biridi. Bizdə ona hər kəs hörmət edir. Muntyanu "Dinamo", "Styaua" kimi komandalarla mübarizədə "Otselul"u çempion etmişdi. Rumıniyada bu, sensasiya hesab olunurdu. Məhz həmin qələbədən sonra "Otselul"a da maraq artdı. Bunun da əsas səbəbkarı Muntyanu idi.
- O, sizi "Qəbələ"yə dəvət edərkən nə dedi?
- Bildirdi ki, "Qəbələ" ölkənin ən yaxşı klublarından biridi. Yeni komandasında ona kömək etməyimi istədi. Ona görə də gəldim.
- Heyətdə sizdən başqa da rumıniyalı futbolçular var: Adrian Ropotan, Kristian Pulhak...
- Onlar əla futbolçulardı. Necə futbol oynadıqlarını bilirəm. Pulhakla "Dinamo"da birgə çıxış etmişik. İnanıram ki, onlarla birgə "Qəbələ"də əla kollektiv yarada biləcəyik. Biz növbəti mövsümdə ən yüksək yerlərdən birini tutmalıyıq.
- Azərbaycan futbolu və futbolçuları barədə məlumatınız var idi?
- "Xəzər Lənkəran"da çıxış edən Adrian Skarlatakeni tanıyıram.
- Onunla bizim futbol barədə danışmısız?
- Əlbəttə. O, Azərbaycan futbolunu və ölkənizi təriflədi. Mənim bu ölkəyə gəlməyimdə onun da xidməti oldu.
- Azərbaycan və Rumıniya yığmaları arasındakı oyunları xatırlayırsız?
- Bəli. 1995-ci ildə biz 4:1 hesabıyla qalib gəlmişdik. 1999-cu ildə isə 4:0 hesabıyla üstün olmuşduq. Həmin vaxt 15 yaşım vardı. Həmin oyunu da yaxşı xatırlayıram.
