"Biz Böyükağa Hacıyevi onun sözlərinə görə cəzalandırdıq"

Albaniyanın "Skenderbeu" klubunun direktoru Cerard Takayın azerisport.az saytına müsahibəsində Çempionlar Liqasının püşkünü dəyərləndirib.

"Biz BATE ilə düşdük. Belarusun ən güclü və ən məşhur komandasıyla qarşılaşacağıq. Amma mən optimistliyimi saxlayıram. Oynamağa və mərhələ keçməyə çalışacağıq".

Takay həmçinin ötən mövsüm qarşılaşdıqları "Neftçi" ilə oyunları da yada salıb: "Ötən mövsüm bizim üçün çox yaxşı alındı. Biz layiqli rəqibə qalib gəldik və növbəti mərhələyə keçə bildik. Amma sonra bəxtimiz gətirmədi. Əvəzində çox gözəl təcrübə toplamış olduq və daha da güclü olduq".

Klub rəsmisi "Neftçi"nin baş məşqçisi Böyükağa Hacıyevin həmin dövrdəki açıqlamalarını da xatırlayıb. Hansı ki, o, yetirmələrinin Albaniya təmsilçisini keçəcəyinə şübhə etmədiyini vurğulamışdı: "Hələ "Neftçi" ilə ilk oyun öncəsi rəqibin baş məşqçisi məni təəccübləndirmişdi. O, dəfələrlə demişdi ki, "Skenderbeu" "Neftçi"yə rəqib deyil. Hətta Bakıdakı ilk oyundan sonra da fikrini dəyişməmişdi. Amma futbolda özünü belə aparmaq olmaz. Biz onu bu sözlərinə görə cəzalandırdıq. Amma biz sadəcə, "Neftçi"nin baş məşqçisinin dediklərinə görə mərhələ adlamadıq. Bu, bizim hədəfimiz idi və ona da çatdıq".

Albaniya çempionu bu il də Azərbaycan təmsilçisi ilə oynamağın əleyhinə deyilmiş: "Dediyim kimi, artıq bu yöndə müəyyən təcrübəmiz var. Düzünü deyim ki, yenidən Azərbaycan klubu ilə qarşılaşmağa ümidliydim".