Saşa Stamenkoviç: Koper Çelikdən daha güclüdü, onlarla qarşılaşacağıq
"Neftçi"nin qapıçısı Saşa Stamenkoviçin azerisport.az saytına müsahibəsi
- Püşkatmanı necə qiymətləndirirsiz?
- Əgər Sloveniya "Koper"i Monteneqro "Çelik"inə qalib gəlsə, bizə bu komanda ilə oynamaq çətin olacaq. Hər iki komanda mənə tanışdı. Şəxsən mən "Çelik"lə düşməyimizi istərdim.
- İlk oyunu evdə keçirməli olacaqsız...
- Fikrimcə, bu, bizim üçün üstünlükdü. Yaxşı dəstək sayəsində qələbə qazana bilərik. Çernoqoriya klubu ötən il qarşılaşdığımız "Skenderbeu" kimidi. Hamı bizim keçəcəyimizi düşünürdü, amma əksinə oldu. Ümid edirəm ki, bu mövsüm eyni aqibətlə üzləşməcəyik.
- Bəs "Koper"?
- Onların "Crvena Zvezda"yla yoxlama oyununu izləmişəm. Serbiya klubu qələbə qazandı, amma sloveniyalılar da öz gücünü göstərdi. 99 faizlik ehtimalla "Koper" mərhələ adlayacaq və biz onlarla qarşılaşacağıq. Amma istənilən halda indi zəif rəqib yoxdu. Bunu dünya çempionatında görmək olur. Kosta Rikadan, Çilidən kim belə çıxış gözləyərdi?
- Mahir Şükürovla Rəşad Sadiqovun gedişindən sonra komandada daha çox gənc futbolçular qalıb. Bu gənclərlə uğur qazana biləcəksiz?
- Avrokuboklarda legioner limiti yoxdu. Digər tərəfdən o gənclərin yanında kifayət qədər təcrübəli legionerlər var. "Neftçi"nin bu heyətlə heç nəyə nail ola bilməyəcəyini düşünənlər yanılırlar. Qoy heç kim narahat olmasın, bizim əla heyətimiz var və uğur qazana biləcək gücdəyik.
- "Neftçi" "Çixura"ya iki yoxlama matçında qalib gələ bilmədi. Bu, sizə mənfi təsir etmir ki?
- Yoxlama oyunlarını güclü yüklənmə fonunda keçiririk. Bu, hazırlıq dönəmidi və nəticə önəmli deyil. Hər iki oyunda da komandamızın üzvləri, gənclər özlərini yaxşı tərəfdən göstəriblər.
