Samir Əliyev: Qurban Qurbanov heç kimdən qorxmur, sadəcə, ehtiyatlı danışır
Futbol üzrə Azərbaycan yığmasının sabiq hücumçusu Samir Əliyev "Qarabağ", "Qəbələ" və "Neftçi"nin baş məşqçilərinin avrokuboklardakı rəqibləri barədə açıqlamalarına münasibət bildirib. Azerisport.az saytına açıqlamasında o, bunları söyləyib:
"Mənə elə gəlir ki, Qurban Qurbanov heç kimdən qorxmur. O, ona görə belə açıqlama verir ki, rəqibə hörmət edir. Prinsipcə, məşqçilərin heç biri rəqiblərə yuxarıdan aşağı baxa bilməz. Hətta Mourinyo, Qvardiola da olsa. Dünya çempionatı da göstərdi ki, indi zəif rəqib yoxdu. Qurbanov hamıdan yaxşı bilir ki, rəqibi necə komandadı, onlarla necə oynamaq olar. Ona görə də elə açıqlama verib. Qorxmur, sadəcə, ehtiyatlı danışır. Məşqçi özünə inanmalıdı. Dorinel Muntyanu isə hələ "Qəbələ"nin potensialı ilə tanış edir. Heç bir ayı tamam olmayıb. Amma elə açıqlama verib. Fikrimcə, düz etməyib.
Böyükağa Hacıyev isə Qurbanovdan fərqli həmişə inamlı açıqlamalar verir. Hamıya uğurlar arzulayıram".
