"İnter Tiraspolu keçməyə borcludu"
"İnter"in direktoru Natiq Məmmədovun azerisport.az saytına müsahibəsi
- Avroliqanın püşkü sizin bəxtinizə Moldova "Tiraspol"unu çıxardı...
- Bizi bu komanda ilə maraqlı oyunlar gözləyir. Görürəm, Avropa Liqasının ikinci təsnifat mərhələsinə yüksəlmək üçün yaxşı şansımız yaranıb. Biz bu rəqibi keçməyə borcluyuq. İnanıram ki, "Tiraspol"a qalib gələ biləcəyik.
- Deməli, "İnter"i cütün favoriti hesab edirsiz?
- Bəli. Mənim fikrimcə, komandamız bu rəqibindən daha güclüdü.
- Püşklə əlaqədar məşqçilər korpusu ilə söhbətiniz olub?
- Bəli. Məşqçilər korpusu demək olar ki, rəqibimizin Moldovadan olmasına fikir vermədilər. Bunu sakit qarşıladılar.
- Ötən mövsüm "İnter" yalnız bir mərhələ keçə bilmişdi. Bu mövsüm üçün qarşınızdakı hədəf nədi?
- Bu dəfə iki mərhələ keçməliyik! Son illər "İnter" ilk turu problemsiz keçir. Ötən mövsüm bizim "Tromse" ilə oyunlarda bəxtimiz gətirmədi. Allah eləsin ki, bu dəfə eyni aqibətlə üzləşməyək.
- İlk oyunun səfərdə olması sizə sərf edir?
- Əlbəttə. Məncə, istənilən futbol adamı belə pley-off oyunlarında ilk matçın səfərdə keçirilməsini müsbət qarşılayar. Bu, "İnter" üçün üstünlükdü.
- Tiraspola necə getməyi düşünürsüz?
- Hazırda elə bu məsələni müzakirə edirik. 27-də Bakıya qayıdıb, oradan da gedə bilərik, birbaşa Avstriyadan da. Öncə Kişinyova gedəcəyik, oradan da 35 dəqiqəlik avtobus yolu ilə Tiraspola.
- Moldova klubunu keçsəz, İsveç "Elfsborq"una rəqib olacaqsız...
- Ötən il iki dəfə Skandinaviya təmsilçisi ilə üz-üzə gəldik. Bu dəfə də vikinqlər rəqibimiz ola bilər. "Tiraspol"u keçsək, çalışacağıq ki, "Elfsborq"la oyunlarda da uğur qazanaq.
