Vallettanın prezidenti: Azarkeşlərimizin də dəstəyi ilə Qarabağı keçəcəyik
Maltanın "Valletta" klubunun prezidenti Viktor Şirixanın azerisport.az saytına müsahibəsi
- Çempionlar Liqasının ikinci təsnifat mərhələsindəki rəqibiniz "Qarabağ"dı. Püşkdən razı qaldınız?
- Ağlıma ilk gələn Azərbaycana səfərin necə keçəcəyidi. Bakı gözəl şəhərdi. Amma ora gedib çıxmaq heç də asan deyil. Bizim bəxtimiz gətirdi ki, ilk oyun evdə olacaq. Deməli, cavab oyununa qədər hələ vaxtımız olacaq.
- Bu, sizin üçün problemdi ki?
- Özü də necə! Azərbaycan Malta üçün kifayət qədər uzaq ölkədi. Çətin və yorucu olacaq. Amma nə etmək olar, püşkatma artıq keçirilib. Onu dəyişmək olmaz.
- Bəs rəqib barədə nə deyə bilərsiz?
- "Qarabağ" barədə heç nə bilmirəm. Qətiyyən! Heç Azərbaycan futbolundan da xəbərimiz yoxdu. Avropa futbolundan soruşun, bu barədə danışa bilərəm.
- Ötən il Azərbaycanın "Xəzər Lənkəran" klubu Malta "Slima Uonderers"i ilə qarşılaşmışdı və mərhələ adlamışdı (1:1, 1:0)...
- Həmin oyuna baxmamışdım. Amma bilirəm ki, "Slima Uonderers" həmin oyunlardan məğlub ayrılmışdı. Halbuki, hesab çox sürüşkən idi.
- Favorit hansı komandadı?
- Bunu deyə bilmərəm. Çünki rəqib komandadakı futbolçuların hansı səviyyədə olduğunu bilmirəm. Orada necə futbolçular oynayır, nə dərəcədə güclüdülər, xəbərsizəm. Amma ümid edir və inanıram ki, mərhələni məhz biz keçəcəyik.
- Öz komandanız barədə nə deyə bilərsiz?
- Malta yığmasının üzvlərindən ibarət layiqli heyətimiz var.
- "Xəzər Lənkəran"ın "Slima Uonderers"lə səfər oyununda yerli azarkeşlər demək olar ki, yox idi. Bəs sizin klubda bu baxımdan vəziyyət necədi?
- Ölkənin ən fəal azarkeşləri bizim komandadadı. "Qarabağ"ın azarkeş baxımından vəziyyəti necədi, bilmirəm, amma bizim oyunlara azı 5 min azarkeş gəlir. Fan-klubumuz komandanı çox səs-küylü dəstəkləyir. Əminəm ki, "Qarabağ"ı bu baxımdan isti qarşılaya biləcəyk. Fikrimcə, azarkeşlərimizin də köməyi ilə Azərbaycan klubuna keçə biləcəyik.
