İnterlə Qəbələnin rəqibini yaxından tanıyaq
Xəbər verdiyimiz kimi, Azərbaycan Avropa Liqasında təmsil edəcək "İnter"lə "Qəbələ" bu turnirin ilk təsnifat mərhələsində müvafiq olaraq Moldova "Tiraspol"u və Bosniya "Şiroki Briyeq"i ilə qarşılaşacaq. Azerisport.az sizi bu komandalarla yaxından tanış edir.
Tiraspol (Moldova)
Tam adı: "Tiraspol" Futbol Klubu
Yaranma ili: 1992
Stadion: "Şerif"
Baş məşqçisi: Vlad Qoyan
Klub 1992-ci ildə Kişinyovda "Konstruktorul" adı ilə təsis olunub. Ötən mövsüm komanda milli çempionatda ikinci olub. İki il öncə isə "Tiraspol" ölkə kubokuna sahib çıxıb.
Komanda indiki adı ilə avrokuboklarda iki dəfə çıxış edib. Ötən mövsüm "Tiraspol" Latvtiya "Skonto"suna yalnız penalti seriyasına uduzub. Əvəzində 2004/05 mövsümündə UEFA Kubokunda Ermənistan "Şirak"ını (2:1, 2:0) mübarizədən kənarlaşdırıb. Sonra isə Ukrayna "Metallurq"una (Donetsk) (0:3, 1:2) uduzaraq mübarizəni dayandırıb.
Komandanın baş məşqçisi Vlad Qoyan 2011-ci ildən bu klubda çalışır. 43 yaşlı mütəxəssisin rəhbərliyi altında İspaniya, Gürcüstan, Bolqarıstan, Serbiya və Latviyadan legionerlər çıxış edir. Azərbaycanın keçmiş "Standard" klubunun sabiq forvardı Dan Pisla da bu komandada oynayır. Hansı ki, həmin dövrlər ona elə "İnter"in baş məşqçisi Kaxaber Sxadadze rəhbərlik edirdi.
"Tiraspol" Azərbaycan klubları ilə avrokuboklarda üz-üzə gəlməyib.
Şiroki Briyeq (Bosniya və Herseqovina)
Tam adı: "Şiroki Briyeq" Futbol Klubu
Yaranma ili: 1948
Stadion: "Peçara"
Baş məqçi: Slaven Musa
Bosniyanın ən qədim klublarından olan "Şiroki Briyeq" yeddi dəfə ölkə çempionu lub, iki dəfə kuboka sahib çıxıb. Komanda son mövsümdə çempionatı ikinci pillədə başa vurub.
Bu komandanın kifayət qədər avrokubok təcrübəsi var. Bosniyalılar ən yaxşı göstəricisini 2005-ci ildə göstərib. Həmin vaxt komanda UEFA Kubokunun pley-off mərhələsinə qədər irəliləsə də, sonda "Bazel"ə uduzub. Ötən mövsüm isə bu komandanı İtaliya "Udineze"si dayandırıb. "Şiroki Briyeq" bütövlükdə avrokuboklarda 40 oyun keçirib, 15 qələbə qazanıb, 5 heç-heçə edib, 19 dəfə uduzub.
"Şiroki Briyeq" Azərbaycan klubları ilə avrokuboklarda bir dəfə qarşılaşıb. 2004-cü ildə "Neftçi" ilə yolları kəsişən bosniyalılar səfərdə 1:0 hesabıyla qalib gəlsə də, evdə 1:2 uduzub.
