Qarabağ Avstriyada ilk məşqinə çıxdı
"Qarabağ" Avstriyada ilk məşqinə çıxıb. Azerisport.az xəbər verir ki, ötən gün səhər ölkəni tərk edərək təlim-məşq toplanışına yollanan komanda məskunlaşdığı otelə çatar-çatmaz ilk məşqinə çıxıb.
"Sonneck" otelinin 200 metr aralıda yerləşən meydanına komanda yerli vaxtla 19:00-da (Bakı vaxtıyla 22:00) yollanıb. Öncə baş məşqçi Qurban Qurbanov futbolçular qarşısında qısa çıxış etdi. Çalışdırıcı hazırlıqdan maksimum yararlanmaq gərəkdiyini ifadə edib.
Ağdamlıların hazırlığı təxminən 90 dəqiqə davam edib. Yüngül isinmə hərəkətlərinin ardından 3 qrupa bölünən komanda "kvadrat" oynayıb. Ardınca 2 qrupa bölünən komanda fərqli sayda toxunuşlarla ikitərəfli oyun keçirib. Sonda isə yüngül qaçışla məşq başa çatıb.
Məşqdə sadəcə, zədəli Rəşad Sadıqov iştirak etməyib. Kapitan fizioterapaevt nəzarətində müəyyən təmrinlər yerinə yetirib.
Qeyd edək ki, Ağdam klubu bu gün Ukrayna çempionu "Şaxtyor"la yoxlama oyununa çıxacaq. Oyunun başlama saatı yerli vaxtla 16:00-a təyin olunub. Buna qədər isə komanda səhər məşqinə çıxacaq. Məşq 10:30-a təyin olunub.
