Şpiçiç: Avropa Liqasında ilk mərhələnin favoriti İnterdi

"İnter"in yarımmüdafiəçisi Matiya Şpiçiçin azerisport.az saytına müsahibəsi

- "Şturm"a qarşı keçirdiyiniz yoxlama oyunu barədə nə deyə bilərsiz?
- Yaxşı oynadıq. Rəqibimiz Avstriya Bundesliqasında çıxış etsə də, onlara qalib gələ bildik. Mənə elə gəlir ki, maraqlı oyun alındı.

- Bu oyunda sizin də iki real qol vəziyyətiniz oldu, amma yararlana bilmədiniz. Nə mane oldu?
- Qol vurmaq şansları təkcə məndə yox, bütün komanda yoldaşlarımda oldu. Yəqin ki, hələ tam hazır deyilik. Daha vacib olan odu ki, avrokubok oyunlarında yaxşı formada olaq.

- İki qol buraxmağınız müdafiədə problemlərin olmasından xəbər vermir?
- Təbii ki, qol buraxmağımız yaxşı göstərici deyil. Amma bizim öz oyunumuzdakı çatışmazlıqları aradan qaldırmaq üçün vaxtımız var. Deməzdim ki, ciddi problemlərimiz var. Sadəcə, işləmək lazımdı. "İnter" bundan da güclü olacaq.

- Bu matçda fərqlənən yeni komanda yoldaşınız Aleksandr Amisulaşvili barədə nə deyə bilərsiz?
- Onun haqda ancaq xoş sözlər deyə bilərəm. Qol vurması münasibətilə təbrik edirəm. Əminəm ki, o, "İnter"də öz sözünü deyəcək və bizə köməyi dəyəcək.

- "İnter"dən avrokuboklarda hansı nəticəni gözləmək olar?
- İlk təsnifat mərhələsində favorit biz olacağıq. Bu mərhələni keçək, sonrasına baxarıq.