Yure Travner: İnanıram ki, Hafiz Məmmədov Bakının da problemlərini həll edəcək
"Bakı"nın müdafiəçisi Yure Travnerin azerisport.az saytına müsahibəsi
- Siz hələ də "Bakı"nın futbolçusuz?
- Bəli. Amma indi Bakıda deyiləm. Ailəmlə birgə Sloveniyadayam.
- Komandada qalacaqsız?
- Əlbəttə. Niyə də qalmayım?
- Maliyyə problemi həllini tapdı?
- Mənim üçün xüsusi fərqi yoxdu. Ümid edirəm ki, hər şey həllini tapacaq.
- Bu problem komandada az narazılıq yaratmır...
- Xeyr. Hər şey qaydasındadı.
- Son mövsüm "Bakı" üçün uğurlu olmadı. Sizcə, buna nə səbəb oldu?
- Əsas rəqiblərimizlə oyunlarda xallar itirdik. Bizə "Qəbələ", "İnter" və "Neftçi" ilə oyunlarda xal itirmək olmazdı. Amma onlara uduzduq.
- Sizin klub son dövrlər daha çox xoşa gəlməyən məqamlarla gündəmdə olur. Hətta deyirdilər ki, legionerlər maliyyə probleminə görə "Qəbələ" ilə oyuna çıxmaq istəmirmiş. Bunlar düzdü?
- Xeyr. Bu, təkcə legionerlərin yox, bütün futbolçuların qərarı idi. Çünki biz bir komandayıq, hamımız birlikdəyik.
- Neçə aydı maaş almırsız?
- Xatırlamıram. Gecikmələr olur. Amma mən həmişə optimist olmuşam. İndi də hesab edirəm ki, hər şey qaydasına düşəcək. Burada elə böyük problem yoxdu.
- Klub prezidenti Hafiz Məmmədovun İngiltərə "Şeffild Uensdey"ini almasından xəbərdarsız?
- Bəli, internetdə oxudum.
- Prezidentin öz klubuna diqqət ayırmayıb, İngiltərə yenisini alması sizi düşündürmür ki?
- Bu, xoşagəlməz işdi. Hafiz Məmmədovun işi çox olur. Bunu onun əhatəsində olanlar da başa düşməlidilər. Boş vaxtı çox az olur. Mən onu "Şeffild Uensdey"i alması münasibətilə təbrik edirəm. Hafiz Məmmədova inanıram, hesab edirəm ki, bizim klubun da problemləri həllini tapacaq.
- Klubdan sizə nə deyiblər?
- Hər şey normal olacaq. Mən buna inanıram.
- Digər klublardan təklif olsa, gedəcəksiz?
- Mən heç kimlə danışıq aparmamışam. Özümü "Bakı"da xoşbəxt hiss edirəm.
