Lansın Liqa 1-ə keçməsi üçün Hafiz Məmmədov sənəd təqdim etməlidi

Fransanın "Lans" klubunun prezidenti Jerve Martel öncədən planlaşdırıldığı kimi, DNCG-nin (Milli idarəçilik nəzarəti müdiriyyəti) toplantısında iştirak edəcək. Azerisport.az xəbər verir ki, bundan sonra o, Azərbaycana səfərə gələcək. Səfərdə məqsəd "Lans"ın aksiyalarına sahib olan azərbaycanlı iş adamı, "Bakı"nın prezidenti Hafiz Məmmədovdan iki vacib sənəd alaraq, onları müvafiq quruma təqdim etməkdi.

Qeyd edək ki, "Lans" Liqa-1-ə vəsiqə qazansa da, bunun üçün hələ müvafiq razılıq da alınmalıdı. Çünki Fransanın maliyyə jandarmları hələ bu barədə yekun qərarlarını açıqlamayıblar. Bunun üçün isə müəyyən zamana ehtiyac var. Bütün lazımlı sənədlər təqdim olunduqdan sonra, DNCG bu barədə öz yekun qərarını bildirəcək.

"Lans" rəsmiləri əksər sənədlərin DNCG-yə təqdim olunduğunu bildiriblər. Amma qərarın təsdiqlənməsi üçün daha bir neçə sənədin təqdim olunması lazımdı. Ötən gün Martel bu məqsədlə Bakıya yola düşüb. Gələn həftə "Lans"ın prezidenti Hafiz Məmmədovdan alacağı həmin sənədləri DNCG-yə təqdim etməlidi.

"l'Equipe" nəşrinin yazdığına görə, iyunun 25-də bütün lazım olan sənədlər DNCG-yə təqdim olunmalıdı. Sözügedən qurum da öz növbəsində həmin gün "Lans"ın Liqa 1-ə keçməsini rəsmən təsdiqləyəcək. Bunun üçün isə "Lans"ın büdcəsinin 40-45 milyon avro olması və daha 10 milyon avro da transferlər üçün ayrılmalıdı. (Fransa mətbuatı)