Vəli Qasımov: Abışovun başqa Rusiya klubuna keçməsinə daha çox sevinərdim

Futbol üzrə Azərbaycan yığmasının sabiq hücumçusu və məşqçisi Vəli Qasımovun azerisport.az saytına müsahibəsi

- Dünya çempionatının startı barədə nə deyə bilərsiz?
- Kifayət qədər maraqlı çempionat izləyirik. Sensasiyalar az deyil. Fikrimcə, qarşıdakı oyunlar daha maraqlı olacaq.

- Hansı sensasiya sizi daha çox təəccübləndirdi?
- Azarkeşlik etdiyim İspaniyanın məğlubiyyəti. Onların 1:5 hesabıyla uduzacağını gözləmirdim. Biabırçı starta rəğmən, bu komandaya mundialın sonunadək azarkeşlik edəcəm.

- Yığmamızın baş məşqçisi Berti Foqtsun yardımçı olduğu ABŞ yığması DÇ-dəki ilk oyununda Qanaya qalib gəldi. Bunu necə qarşıladınız?
- Foqts bizdən başqa hamıya kömək edir. Onun ABŞ yığmasına nə dərəcədə yardımçı olduğunu bilmirəm. Yəqin ki, mənəvi baxımdan dəstək olur. ABŞ yığması güclü komandadı. Ən azından 1/4 finala qədər irəliləyə bilərlər.

- Klublarımızın avrokuboklardakı şansları barədə nə düşünürsüz?
- Püşkatmadan çox şey asılıdı. Amma indidən daha çox "Qarabağ"a ümid bəslədiyimi deyə bilərəm.

- Bəs "Neftçi", "İnter", "Qəbələ"?
- Oyununa görə ağdamlılar bu rəqiblərini qabaqlayır. "Qarabağ" Premyer Liqanı layiqli şəkildə qalib kimi başa vurdu. Yerli klublar arasında da avrokubokların favoritidi. Onlar sabit çıxış edirlər, təcrübələri var. Ümid edirəm ki, "Qarabağ" bu mövsüm böyük uğurlar qazanacaq.

- Uğur deyəndə nəyi nəzərdə tutursuz?
- Çempionlar Liqası və ya Avropa Liqasının qrup mərhələsinə vəsiqə qazanmağı.

- Ruslan Abışov "Rubin"dəki uğursuz karyerasının ardından "Qəbələ"yə qayıtmağa yaxındı. Buna münasibətiniz necədi?
- Əgər qayıdırsa, deməli, orada özünü narahat hiss edib. Yəqin ki, özünü Azərbaycanda daha güclü futbolçu hesab edir, nəinki Rusiyada. Hər kəsin öz xarakteri var. Amma mən onun başqa Rusiya klubuna keçməsinə daha çox sevinərdim.