Aleksandr Tomovski: Bakı mənə olan borcunu ödəməsə, cəzalanacaq

Xəbər verdiyimiz kimi, FİFA "Bakı"nın bolqarıstanlı sabiq futbolçusu Aleksandr Tomovskiyə (Tomaş) cəzalandıra bilər. Azerisport.az xəbər verir ki, paytaxt klubunun sabiq oyunçusuna 2008/09 mövsümündən borcu qalıb.

Lakin maraqlıdı ki, "Bakı"nın vitse-prezidenti Yaşar Seyidov Tomovskinin həmin mövsümdə qazanılan çempionluğa görə mükafata layiq olmadığını iddia edir. Bu üzdən Tomaşın özü ilə söhbətləşməyə qərar verdik. O, öncə bunları söylədi:

"Mən sadəcə, klubun mənə olan borcunu istəyirəm. Bu, 25 000 dollardı. Ona görə də FİFA-ya müraciət etmişəm. Mən mükafatın məbləğindən danışmıram. İstirahətdə idim. Klubdan mənə xəbər verdilər ki, artıq məni komandada görmək istəmirlər. Onu da bildirdilər ki, yerdə qalan 25 min dolları mənim hesabıma köçürəcəklər. Amma bunu etmədiklərinə görə şikayətçi oldum".

"Mən iki illik müqavilə imzalamışdım. Sonra komandadan gedəsi oldum. Oynadığım dövrün də pulunu tələb edirəm. Amma onu vermək istəmirlər".

Tomovski bu məsələnin niyə altı il sonra üzə çıxmasına da aydınlıq gətirib: "Mən FİFA-ya hələ 2010-cu ildə şikayət etmişdim. Məsələnin niyə bu qədər uzandığını, onların niyə məhz indi qərar verdiyini başa düşmürəm, bilmirəm".

Tomovski bəyan edib ki, "Bakı"nın vəkilə müraciət etməsindən və pulu ödəmək fikrinin olmamasından xəbərdardı: "Bakı" mənə olan borcunu ödəməsə, FİFA bu klubu cəzalandıracaq. Öncə xallarını siləcəklər, daha sonra aşağı diviziona göndərəcəklər. Amma ümid edirəm ki, vəziyyət o həddə çatmaz və klub borcunu ödəyər".