Liviu Antal: Muntyanu məni Qəbələdə görmək istəyir
"Qəbələ"nin transfer etmək istədiyi rumıniyalı yarımmüdafiəçi Liviu Antalın azerisport.az saytına müsahibəsi
- Rumıniya mətbuatı sizin "Qəbələ"yə keçəcəyinizi yazır. Bu, düzdü?
- Etiraf edim ki, bu klubdan mənə konkret təklif gəlməyib. Amma bütövlükdə belə bir məsələ var. Baxaq, görək hər şey necə nəticələnəcək.
- "Qəbələ"nin yeni baş məşqçisi təyin olunan həmyerlinizlə - Dorinel Muntyanu ilə söhbətiniz olub?
- O, məni bir futbolçu kimi yaxşı tanıyır. Muntyanu ilə telefon danışığımız olub. O, məni "Qəbələ"də görmək istəyir.
- Bəs niyə razılaşmırsız?
- Mən hələ heç nəyə qərar verməmişəm.
- Deyilənə görə, sizə "Styaua"dan da təklif var...
- Bəli, var.
- Buxarest klubunun təklifi rəsmidi?
- Xeyr. Orda da "Qəbələ"dəki kimidi. Ora da məni baş məşqçi çağırır. Ancaq konkret təklif irəli sürməyiblər. Hər halda bu gün-sabah yekun qərarımı verəcəm.
- Siz vaxtilə Muntyanunun rəhbərliyi altında "Otselul"da çıxış etmisiz. O, necə məşqçidi?
- Uduzmağı xoşlamayan məşqçidi. Onunla çalışmaq çox xoşdu. Muntyanunun zamanında "Otselul" çox uğurlu çıxış edirdi.
- Azərbaycanda tanıdıqlarınız var?
- Bəli. Mənim Raul Kostin, Marius Pena və Kaue ilə çox yaxşı münasibətlərim var. Kostin artıq Rumıniyaya qayıdıb. Penanın "Bakı"da oynadığını bilirəm. Kaue isə Azərbaycana yenicə gedib.
- Kauenin ardınca Azərbaycana gəlmək barədə düşünmürsüz?
- Hələ dəqiq bir söz deyə bilmərəm. 1-2 günə hansı kluba keçəcəyimə aydınlıq gətirəcəm.
