Rauf Əliyev: Xorvatiyanın oktyabrda bizi məğlub edəcəyinə heç kim zəmanət verə bilməz
Futbol üzrə Azərbaycan yığmasının və "Bakı"nın hücumçusu Rauf Əliyevin azerisport.az saytına müsahibəsi
- Dünya çempionatında favoritiniz kimdi?
- Argentinaya azarkeşlik edirəm.
- Yəqin ki, çempion kimi bu komandanı görmək istərdiz...
- Əgər Messi varsa, hər şey mümkündü. Amma Almaniya, Hollandiya kimi güclü komandalar da var.
- Bu turnirdə sizi məyus edən və ya sevindirən nəsə olub?
- İspaniya məyus etdi. Hollandiyaya məğlubiyyəti haradasa başa düşmək olardı, amma Çiliyə yenilgi heç bir çərçivəyə sığmır. Bu, bizim tanıdığımız dünya və Avropa çempionu deyil. DÇ ərəfəsində heç kim inanmazdı ki, ispanlar qrupdan çıxa bilməyəcəklər. Amma bu mundialda çoxlu qol vurulur ki, bu, sevindirici məqamdı.
- AÇ-2016-nın seçmə mərhələsindəki rəqiblərimiz Xorvatiya və İtaliya yığmalarını yaxından izləyirsiz?
- Düzünü deyim ki, onların çıxışını xüsusi olaraq izləmirəm. Çünki hələ seçmə mərhələyə xeyli vaxt var. Bu iki komanda onsuz da hamıya bəllidi. İndi onları xüsusi izləməyimizin də mənası yoxdu. İstənilən halda onların qrupumuzun favoritləri olduğunu bilirik.
- Yəqin ki, Xorvatiyanın ötən gecə Kameruna 4 cavabsız qol vurmasına görə belə düşünürsüz...
- Bu, futboldu. Çıxıb öz oyunumuzu oynayacağıq. Əlimizdən gələni edəcəyik. Bu dünya çempionatı da göstərdi ki, futbolda hər şey ola bilər. Əgər Kosta-Rika Uruqvayı məğlub edə bilirsə, niyə biz də sürpriz etməyək?
- Azərbaycan öz qrupunun Kosta-Rikası ola bilər?
- Bunun üçün kosta-rikalı olmaq lazım deyil. Azərbaycan yığması əvvəllər də bir neçə sürprizə imza atıb. Oktyabrda Xorvatiyaya qarşı keçirəcəyimiz oyunda bu komandanın qələbəsinə heç kim zəmanət verə bilməz.
- Xorvatiyalı azarkeşlər Braziliya ilə ilk oyun zamanı stadionda faşist simvolu olan banner açdıqlarına görə bu komanda cəzalana bilər. Məsələn, istisna deyil ki, xorvatlar AÇ-2016-nın seçmə mərhələsinə mənfi xalla başlasınlar. Bu, bizə nə kimi üstünlük qazandıra bilər?
- Bu barədə indidən nəsə demək çətindi. Qoy xallarını silsinlər, sonra bunun bizim üçün yaxşı olub-olmadığından danışarıq (gülür).
