Maksim Medvedev: Qrup mərhələsi barədə hələ düşünmürük
Futbol üzrə Azərbaycan yığmasının və "Qarabağ"ın müdafiəçisi Maksim Medvedevin azerisport.az saytına müsahibəsi
- Hazırda Bakıda məşq etsəz də, qarşıda sizi Avstriya toplanışı gözləyir...
- Ayın 22-də oraya yollanmalıyıq. Avstriyada güclü klublara qarşı yoxlama oyunları keçirəcəyik. Onlara hazırlaşmalıyıq. Biz də zəif deyilik. Toplanış zamanı nə qədər güclü rəqiblərlə qarşılaşsaq, Çempionlar Liqasında bir o qədər faydasını görərik.
- "Qarabağ"dan ÇL-in qrup mərhələsinə düşməsi gözlənilir. Sizin üçün bu, realdı, yoxsa əlçatmaz?
- Avropa Liqasının qrup mərhələsinə düşmək ÇL-in qrupuna düşməkdən daha asn olacaq. Bu turnirlər arasında səviyyə fərqi yüksəkdi. Amma qoy bizə inansınlar, dəstəkləsinlər. Biz də gücümüz çatan qədərilə maksimum nəticə göstərməyə çalışacağıq.
- Rəhbərlik komandanın qarşısına hansı hədəfi qoyub?
- Bizim ilkin hədəfimiz ikinci təsnifat mərhələsində uğurlu çıxış edib, mərhələ adlamaqdı. Hazırda biz hələ qrup mərhələsi haqda düşünmürük. Buna tədricən nail olmalıyıq. Əlbəttə, biz çox şey istəyə bilərik. Amma hər şeyə real yanaşmaq lazımdı. ÇL-in qrup mərhələsinə vəsiqə qazanmaq çətindi. Çünki bu yolda qarşılaşacağımız bütün rəqiblər öz ölkələrinin çempionlarıdı. Ona görə indi söz verə bilmərik ki, "Qarabağ" ÇL-in qrup mərhələsində çıxış edəcək. Elə ilk mərhələdə bizə elə rəqib düşə bilər ki, onu keçə bilmərik. Amma rəqibləri analiz edəcəyik və çalışacağıq ki, ən yaxşısına nail olaq.
- Avrokuboklar öncəsi "Qarabağ" hələlik üç transfer edib - Danilo Dias, Tərlan Quliyev və Cavid Tağıyev...
- Tərlan Quliyevin çıxışını "Neftçi"də olarkən görmüşəm. O, özünü həmişə yaxşı tərəfdən göstərməyə çalışıb. Xüsusilə də "Qarabağ"la oyunlarda. "Qarabağ" bu transferdən fayda görəcək. Heyətdə rəqabət daha da güclənmiş oldu. Tərlan avrokuboklarda da "Qarabağ"a kömək edəcək gücdədi. Daniel Dias da yaxşı futbolçudu. İnanıram ki, həm o, həm də Cavid Tağıyev komandamıza xeyir verəcək.
- Dünya çempionatını izləyirsiz? Favoritiniz kimdi?
- Qruplardakı ilk oyunlar çox gərgin keçdi. Hətta açılış oyunu olan Braziliya - Xorvatiya matçı sanki final qarşılaşması idi. Heç kim uduzmaq istəmir. Amma mənim favoritim Almaniyadı. Onlara uşaqlıqdan azarkeşlik edirəm. Bu çempionatda sürprizlər də istisna deyil. Məsələn, çox az adam inanardı ki, İspaniya Hollandiyaya elə hesabla uduzacaq.
- AÇ-2016-nın seçmə mərhələsindəki rəqiblərimiz olan İtaliya və Xorvatiya yığmaları barədə nə deyə bilərsiz?
- Xorvatların güclü olduğunu bilirdim. Amma onların Braziliyaya qarşı oyunlarını izləyib daha da təəccübləndim. Onların bu qədər güclü olduqlarını bilməzdim. Bu komanda istənilən rəqibə problem yaradacaq gücdədi. İtaliya da İtaliyadı. Onlar haqda əlavə nəsə deməyə ehtiyac yoxdu. Xorvatiya Braziliyaya qarşı belə oynayırsa, indi görün Azərbaycana qarşı necə çıxış edəcək. Onların bizə qarşı da müdafiədən oynayacağına şübhə edirəm. Böyük ehtimalla hücum futbolu oynayacaqlar. İtaliya barədə də eyni sözləri demək olar. Həmin oyunlarla bağlı indidən proqnoz vermək isə çox çətindi.
- Sizcə, yığmamız bu rəqiblərindən xal ala bilər?
- Biz bu komandaların nəyə qadir olduğunu gözəl bilirik. Amma onların Braziliyadakı çıxışını izlədikdən sonra bizə necə çətin olacağını bir daha başa düşdük. Ona görə də daha yaxşı hazırlaşmaq lazımdı.
