Elvin Yunuszadə: Qattuzo postundan getdiyinə görə Syona keçidim alınmadı
"Neftçi"nin müdafiəçisi Elvin Yunuszadənin azerisport.az saytına müsahibəsi
- Hazırlıq necə keçir?
- Biz hələ ki, bir gündü Boludayıq. Heyətdə yenilər var. Əlimizdən gələni edəcəyik ki, yeni gələnlər komandaya tez uyğunlaşa bilsinlər.
- "Neftçi"dən Avropa Liqasında hansı nəticəni gözləyirsiz?
- Biz bir dəfə tarix yazmışıq. Buna görə də bizdən uğurumuzun təkrarlanmasını gözləyirlər. Amma futbolda hər şey ola bilər.
- Sizcə, ötən mövsüm sizin üçün uğurlu alındı?
- Çempionatda yox. Çünki Premyer Liqada biz elə də yaxşı çıxış etmədik. Amma kubokdakı çıxışımızı yüksək qiymətləndirirəm. Biz kuboku qazanmağı bacardıq.
- "Qarabağ"ın çempionluğu barədə nə deyə bilərsiz?
- Ağdamlıları bu qələbə münasibəti ilə təbrik edirəm. Onlar güclü idilər və qalib gələ bildilər. Bu komandaya Çempionlar Liqasında uğurlar arzulayıram. Ümumiyyətlə, avrokuboklardakı bütün təmsilçilərimizə uğur diləyirəm.
- Bugünlərdə Tərlan Quliyev "Neftçi"dən "Qarabağ"a keçdi...
- Onun qərarına hörmətlə yanaşmaq lazımdı. Tərlan yaxşı oğlandı, perspektivli futbolçudu. İnanıram ki, "Qarabağ"da böyük uğurlar qazanacaq. İnşallah, hər şey onun istədiyi kimi olar.
- "Neftçi"yə isə Kaue transfer olunub. O, komandanıza xeyir verə biləcək?
- O, həqiqətən də yaxşı oyunçudu. İnanıram ki, Kaue "Neftçi"yə fayda verəcək.
- Ötən il sizin İsveçrə "Syon"una keçidiniz gündəmdə idi. Niyə alınmadı?
- Bəli, belə bir şey vardı. Amma Cennaro Qattuzonun postundan getməsi səbəbindən transfer baş tutmadı. Əks halda indi orada çıxış edirdim.
- İndi bəzi klublardan dəvət almağınız haqda xəbərlər doğrudu?
- İndi bu barədə danışmaq istəmirəm. Qoy bir qədər vaxt keçsin, hər şey bəlli olacaq.
